Эрүүл мэндийн сайд С.Энхболд ДЭМБ-ын Эмнэлэг тусламжийн баг манай улсад ирж, 40 хоногийн хугацаатай Эрүүл мэндийн яаманд ажиллах талаар мэдээлсэн. Тэгвэл уг баг өнөөдөр 22:00 цагт Улаанбаатарт газардах юм байна. Улмаар ЭМЯ-нд ажиллаж, коронавирусийн эсрэг авч буй арга хэмжээний талаар болон цаашид авах арга хэмжээний талаар заавар зөвлөгөө өгч ажиллах аж.

Энэ талаар ЭМЯ-ны Эмнэлгийн тусламжийн зохицуулах газрын дарга Б.Буянтогтох “Хоёр эмч, сувилагч, туслах ажилтан зэрэг долоон хүний бүрэлдэхүүнтэй баг ирж байгаа. Манай улсын эмч нарыг үе шаттай сургана. Хэрвээ бүс нутгийн хэмжээнд халдварын тархалт нэмэгдээд ирвэл Монгол Улсын эмч, эмнэлгийн ажилчид гадагш явж, ДЭМБ-ын эмч нараас хуримтлуулсан туршлага мэдлэгээрээ бусад оронд туслах боломж нээгдэж байна” хэмээн ярьсан нь бий.

Түүнчлэн ЭМЯ-наас Эрчимт эмчилгээний эмч нарын төлөөллөөс оролцуулан сургалтад хамруулахаар төлөвлөөд буй.