Эрүүл мэндийн сайд С.Энхболд улаан бүсэд ажиллаж байгаа эмч, ажилтан, хэвтэн эмчлүүлж буй өвчтөнүүдтэй уулзаж, эмнэлгийн нөхцөл байдалтай танилцлаа. Тодруулбал, өнөөдөр буюу долдугаар сарын 12-нд Цэргийн төв эмнэлэг, Баянгол дүүргийн хүүхдийн эмнэлэг, Хотын захиргааны шинэ байранд дэлгэсэн 145 ор бүхий яаралтай тусламжийн шинэ эмнэлэгт очиж, эмч, ажилтантай уулзжээ.

Энэ талаар Эрүүл мэндийн сайд С.Энхболд албан ёсны цахим хуудаснаа “Наадмын өдрүүдээр эмнэлгийн бүх албан хаагчид өндөржүүлсэн бэлэн байдалд цаг, наргүй ажиллаж байгаа. Эрүүл мэндийн яамны зүгээс наадмын өдрүүдээр амарч чадахгүй байгаа эмч, ажилтнуудтай уулзаж, урам өгөх нь чухал. Ковидын бүх эмнэлгүүд наадмын өдрүүдээр иргэдэд эмчилгээ, тусламж, үйлчилгээ өгөх чиглэлд дэмжиж, тусална” гэжээ.