-Хоолны хордлого, наршсан дуудлага энэ жил бага байна-

       Энэ жилийн хувьд Улсын их баяр наадмыг тэмдэглэхийг хойшлуулсан ч бүх нийтийн ес хоногийн амралтыг хэвээр үргэлжлүүлэх шийдвэр гаргаад буй. Үүнтэй холбогдуулан хөдөө орон нутаг руу чиглэх хөдөлгөөн эрс ихэссэн.  Агаар салхинд гарч, аялал зугаалгаар явж буй иргэдийн хувьд  хоолны хордлогод орох, нарших даралт ихсэх тохиолдол нэлээд гардаг. Яг энэ цаг үед өрхийн эрүүл мэндийн төвүүд болон эрүүл мэндийн  байгууллагуудад үүнтэй холбоотой дуудлага мэдээлэл хэр ирж байгаа болон болон бага насны хүүхэдтэй эцэг, эхчүүд юуг анхаарах талаар мэргэжилтнээс тодрууллаа.

        Баянзүрх дүүргийн наймдугаар хороо  “Ачлахуй” өрхийн эрүүл мэндийн төвийн жижүүр эмч “Одоогийн байдлаар хүүхдийн хоолны хордлого болон наршсан  талаар дуудлага мэдээлэл ирээгүй байна. Гэхдээ иргэд хөдөө агаар салхинд ихээр гарч байгаа энэ үед анхаарах хэд хэдэн зүйл бий.  Агаарт гарч, хөдөө зугаалгаар явж байгаа иргэдийн хувьд хорхог боодог идэх нэрийдлээр шарсан хуурсан махны араас хүйтэн ундаа, жүүс ихээр хэрэглэх, томчууд нь согтууруулах ундаа хэтрүүлэн хэрэглэх зэрэг нь ходоод гэдэс хямрах шалтгаан болдог.  Мөн цаг агаарын нөхцөл байдалтай холбогдуулан хэт халуун өдрүүдэд наршихаас болгоомжлон, хүүхдийн толгойг ойр ойрхон норгох, шаардлагатай арга хэмжээнүүдийг авах хэрэгтэй” гэж зөвлөлөө.

      Харин Чингэлтэй дүүргийн “Мэнд цолмон” нэгдүгээр хорооны өрхийн эрүүл мэндийн төвийн жижүүр эмч “Чингэлтэй дүүргийн хэмжээнд хороодын өрхийн эмнэлгүүд өөрсдийн утсанд дуудлага мэдээллийг амралтын өдөр гэлтгүй хүлээж аван зөвлөгөө өгч ажиллаж байгаа. Одоогоор хоолны хордлого болон наршилттай холбоотой дуудлага ирээгүй” гэлээ. Мөн цаг агаарын нөхцөл байдлаас шалтгаалан хэт халуун үед

• Биеийн халуун нэмэгдэх
• Цээж багтран амьсгаа цухалдах
• Царайны өнгө цонхийж цайх
• Бөөлжис хүрч, дотор муухайрах
• Хөлс гарах нь багасах, ихсэх
• Нүүр чинэрэн улайх зэрэг шинж тэмдгүүд илэрвэл яаралтай арга хэмжээг авч, харьяа дүүргийн эрүүл мэндийн төвөөс зөвлөгөө мэдээлэл авах нь зүйтэй.

Даралт ихтэй, өндөр настай иргэд, хүүхэд багачуудын нарны малгай болон нарны хамгаалалттай шүхэр хэрэглэх, шингэн зүйл сайн уух, хурц нартай үед наранд удаан хугацаагаар явахгүй байхыг зөвлөлөө.

Н.АРИУНСАЙХАН