Боловсрол, шинжлэх ухааны сайдын тушаалаар байгуулагдсан ажлын хэсэг Ерөнхий боловсролын сургуульд сэтгэл зүйч ажиллуулах эрх зүйн орчин болон дэлхийн улс орнуудын туршлагыг харьцуулан судалж, богино, дунд хугацааны төлөвлөлтийг боловсруулсан. Улмаар “Тогтвортой хөгжлийн боловсрол II” төслийн түшиц Ерөнхий боловсролын 30 сургуульд ажиллах сэтгэл зүйчийг сонгон шалгаруулжээ. Сэтгэл зүйчийн сонгон шалгаруулалтад 73 хүн материалаа ирүүлж хоёр шатны шалгаруулалтын дараа 30 сэтгэлзүйчийг сонгосон байна.

  Мөн Ерөнхий боловсролын сургуулийн сэтгэл зүйчийг мэргэшүүлэх сургалтын хөтөлбөрийг боловсруулж, баталжээ. Дээрх сонгон шалгаруулалтад тэнцсэн 30 сэтгэл зүйчийг долдугаар сарын 26-наас сургалтад хамруулахаар бэлтгэл ажлаа хангаж байгаа аж.