Л.ЭНХ-АМГАЛАН: Ирэх намар үдийн цайг үдийн хоол болгоно

2021-06-11, 686

Боловсролын салбарын төсвийн цахим шинэчлэлийн нээлт боллоо.

Энэхүү арга хэмжээнд оролцох үеэрээ Боловсрол, шинжлэх ухааны сайд Л.Энх-Амгалан “Боловсролын салбар цахим төсөв гэдэг чухал шинэчлэл эхлүүллээ. Монгол Улсын төсвийн 20 гаруй хувь буюу 1,7 их наяд төгрөг зөвхөн боловсролын салбарт зарцуулагддаг. Гэвч энэ мөнгө юунд зарцуулагдаж байгаа нь нээлттэй биш байдаг. Төсвийг цахим болгосноор эцэг эхчүүд, ард иргэдийн хяналттайгаар төсвийг зарцуулах боломжтой болно. Эхний ээлжид төсвийн шинэчлэлд төрийн өмчит 800 орчим сургууль, 1100 орчим цэцэрлэг хамрагдана. Харин ирэх жилийн намраас их сургуулиудад төсвийн шинэчлэлийг хэрэгжүүлж эхэлнэ. Боловсролын салбар ирэх хичээлийн жилд гурван том арга хэмжээ авч хэрэгжүүлнэ. Нэгдүгээрт, ковидын хоцрогдлыг арилгана. Ингэхдээ шат дараатайгаар ирэх гурван жилд арилгах болно. Хоёрдугаарт, ерөнхий боловсролын сургуулийн сурагчдын үдийн цайг хоол болгоно. Ирэх намар 1-5 дугаар ангийн сурагчид үдийн цай уух биш үдийн хоол идэх болно. Энэ ажлыг хэрэгжүүлэхэд шаардлагатай бүх арга хэмжээг эхлүүлсэн байгаа. Гуравдугаарт, нүхэн бие засах газартай 840 орчим сургууль, цэцэрлэг, дотуур байр байдаг. Үүний 50 хувийг орчин үеийн стандартад нийцсэн ариун цэврийн өрөөтэй болгоно. Энэхүү ажлыг “Эрдэнэт” үйлдвэр нийгмийн хариуцлагын хүрээнд санхүүжүүлж байгаа. Улмаар ирэх жил 100 хувь стандартад нийцсэн ариун цэврийн өрөөтэй болгох төлөвлөгөөтэй байна” гэлээ.

Л.ЭНХ-АМГАЛАН: Ирэх намар үдийн цайг үдийн хоол болгоно

Шинэ мэдээ

Нийтлэлчид