Хүслээ “Нарантуул” олон улсын худалдааны төвд малгайны лангуунд “худалдагч” хийдэг. Тэр одоо 13 настай. Бид олон улсын хүүхдийн эрхийг хамгаалах өдрийг тохиолдуулан түүний “ажлын байр”-наас дараах сурвалжилгыг бэлдлээ. 

Малгайны лангууны 13 настай “худалдагч” ХҮСЛЭЭ

            "Нарантуул" захын зүүн хойд буланд байрлах малгайны лангууд Хүслээ таван жилийн өмнөөс малгай зарж эхэлжээ. Хүслээгийн ээжийн дүү “Нарантуул” захад малгайны худалдаа эрхэлдэг юм байна. Түүний ажилд Хүслээ тусалж, найман настайгаа малгайны лангууны туслагч болсон гэнэ. Өндөр биетэй, махлагдуу бор хүү хэдийн худалдагч шиг “Ямар малгай сонирхож байна эгч ээ, таны царайнд энэ малгай зохих юм байна” хэмээн надад хар өнгийн чампион гэсэн бичигтэй саравчтай малгай санал болгов. Хүмүүстэй "Ах аа, эгч ээ" гээд их л эвтэйхэн, уриалгахан харьцаж байгаа харагдана. Тэр лангууныхаа "худалдагч", үйлчлүүлэгчид малгай санал болгогч, загвар "зохион бүтээгч", мөнгө хураагч, данс хэлэгч, орсон гүйлгээ шалгагч гээд бүхий л ажилд гар бие оролцдог аж. Биднийг түүнтэй ярьж зогсох зуур гурван ч залуу малгай авав. Хүслээ "Зун болж байгаа болохоор хүмүүс дугуй малгай сонирхож байгаа. Өдөртөө болж өгвөл олныг л зарахыг хичээдэг. Манай лангуу захад болохоор үнэ нь арай хямд байдаг шүү. Тэгээд ч материал сайтай малгайнууд байдаг. Хүүхдийн, том хүний 10 гаруй төрлийн малгай бий. Дуртайгаа л сонгоод авах хэрэгтэй" гэлээ.

         Хүслээ "Нарантуул" захад өдөрт 3-4 цаг зогсдог гэнэ. Өглөө ирж малгайнуудаа гаргаж өлгөх, өдрийн цайны цагаар лангуугаа харах, орой малгайгаа хураах ажлыг гардаж хийдэг аж. Энэ талаараа Хүслээ "Би хүнд ажил хийдэггүй юм аа. Эгчдээ л тусалж, ганц, хоёр малгай зардаг. Зуны амралтаараа малгай зарсаар байгаад сурчихсан. Хүмүүстэй харьцаад, олон малгай зарвал гоё байдаг. Хамгийн гол нь хүмүүстэй зөв харьцаж сурдаг болохоор зах дээр ирэх дуртай. Манай гэр ойрхон болохоор би өөрөө гүйгээд хүрээд ирдэг. Хичээл орж байгаа үед бол наашаа зүглэхгүй. Ээж “Хичээлээ сайн хийж, эрдэм номтой хүн болох хэрэгтэй” гэж хэлдэг. Тийм болохоор би аль болох хичээлээ давтаж,олимпиадад амжилттай оролцохыг хичээдэг” гэлээ.

Эдийн засагч болох мөрөөдөлтэй Хүслээ

Хүслээ эдийн засагч болох мөрөөдөлтэй гэнэ. Тэрбээр одоо наймдугаар ангийн сурагч. Ээжийнхээ хэлдэг захиас, өөрийнхөө мөрөөдлийг биелүүлэхийн тулд тэр өөрийгөө өчигдрөөс илүү хурцалж, үргэлж хичээдэг гэнэ. Хүслээ энэ талаараа “Хурдан шуурхай байх хэрэгтэй. Би сургуулийнхаа математикийн дугуйланд явдаг. Багш намайг байнга хурдтай байхыг зөвлөж, заадаг юм. Сурсан зүйлээ үргэлж хөгжүүлж, нэмэгдүүлж байвал болох нь тэр” гэв.

Хүслээгийн эгчийн лангууны хажууд байрлах улавч, цүнх, хивсний лангуунд түүний насны 3-4 хэрсүү хөвгүүн бас аав, ээждээ тусалдаг юм байна. Тэд нэг нэгнээсээ уралдаж, ачаагаа зөөх, хүнд бараагаа зарж, өрсөлдөж байгаа харагдав. Хүслээ энэ талаар ярихдаа "Энэ хавийн хүүхдүүдтэй найзууд болсон. Хүүхдүүд аав, ээжийгээ дагаад хаяа л ирдэг юм. Ангийнх нь хүүхдүүд чөлөөт цагаараа зах дээр ажилладаг гэхээр хүнд ажил хийдэг гэж ойлгодог юм шиг байна лээ. Бид чинь зүгээр л туслагч шүү дээ. Өөрсдөө хүссэндээ л энд ирдэг гэдгийг хүмүүс ойлгодоггүй. Зах дээр байхаар олон хүнтэй харьцаж сурдаг. Бас олон хүн таньдаг болно. Гэхдээ одоо халдвар их байгаа учраас хүүхдүүд бараг ирэхгүй байгаа. Аав, ээж нь явуулахгүй байгаа юм шиг байна лээ"гэв.

Хэрсүү бор хүүгийн ажил тарах цаг болжээ. Тэр ах, эгчийнхээ хамт лангуугаа буулгаж, малгайнуудаа модон бор авдартаа эгнүүлж хийгээд, бат гэгч нь түгжээд түрж одов.