Нийслэлийн боловсролын Бодлого хэрэгжилтийн хэлтсийн дарга Ц.Жаргалантуул өчигдөр мэдээлэл хийхдээ “Хичээл эхэлснээс хойш ерөнхий боловсролын зургаан сургууль зайны сургалтад шилжсэн бол өнөөдрийн байдлаар зайны сургалтад бүрэн шилжсэн сургууль байхгүй. Харин Насан туршийн боловсролын хоёр төв зайны сургалтад бүрэн шилжсэн. Одоогоор нийслэлийн 52 дугаар сургуулийн 12-оос доош насны буюу бага ангийн 88 бүлэг, дунд болон ахлах ангийн 112 бүлэг зайны сургалтад шилжсэн” гэсэн. Мөн иргэдийн дунд хүүхдүүд их халдвар аваад байгаа учир зарим эцэг, эх хүүхдээ сургуульд нь явуулахгүй байгаа гэнэ. Үүнтэй холбогдуулан бид зарим сургуулиар орж бодит нөхцөл байдалтай танилцлаа.

-ХҮҮХДҮҮД ГЭРТЭЭ БАЙХ ҮЕДЭЭ ХАЛДВАР АВЧ БАЙНА-

11:00 цаг

   Сүхбаатар дүүргийн ХVIII хороонд байрлах Монгол III сургуульд очлоо.  Сургуулийн хаалган дээр коронавирусийн халдварын зөвлөмж наасан байхаас гадна сурагч, багш, ажилтнаас өөр хүн оруулахгүй байв. Зайлшгүй шалтгаанаар тус сургууль руу орох ажилтай хүн жижүүр багшид учраа хэлж, халуун шалгах төхөөрөмжид халуунаа хэмжин, ариутгалын хаалгаар дотогш орох аж. Хичээл хэдийн эхэлж, сургуулийн орчин нам гүм байв. Ингээд сурагчдын халдвар хамгааллын дэглэмийн талаар жижүүр багш Н.Жаргалантаас тодруулахад “Манайх цахим, танхимаар хичээллэж байна. Одоогоор цахимд шилжсэн анги байхгүй. Хичээл эхэлсэн эхний долоо хоногт дөрөвдүгээр анги долоо хоног цахимд шилжсэн. Хүүхдүүд сургуульдаа явж байх үедээ халдвар авсан тохиолдол байхгүй. Хүүхдүүд гэртээ байх үедээ халдвар авч байна. Бид эцэг, эхчүүдэд хүүхдүүдээ ханиаж, халуурсан тохиолдолд сургууль руу явуулахгүй байх шаардлагыг тавьж байгаа. Хэрэв хүүхдүүд болон багш, ажилчдаас халдвар илэрвэл тусгаарлах өрөөнд тусгаарлана” гэлээ.

   Энгийн үед нэг ангид 30-40 хүүхэд суралцдаг. Тэгвэл коронавирусийн халдвараас сэргийлэх журмын хүрээнд нэг ангид 15-20 хүүхэд хичээллэхээр болсон. Энэ журмын дагуу Монгол III сургуулийн ангиуд хичээллэж байгаа бөгөөд 1.5-2 метрийн зайг баримтлан ширээгээ байршуулсан байлаа. Хүүхдүүд амны хаалтаа зүүж, ширээн дээрээ жижиг савтай ариутгагч тавьсан байв. Ийнхүү ангид хоёр цагийн зайтай үйлчлэгч цэвэрлэгээ хийж, агаар оруулдаг бөгөөд мананцар үүсгэгчээр мөн ариутгал хийдэг гэнэ.

-БАГА АНГИЙН 4-5 АНГИ ЦАХИМ ХЭЛБЭРТ ШИЛЖСЭН-

12:00 цаг

   Цааш явсаар нийслэлийн ерөнхий боловсролын I сургуульд хүрэв. Мөн ахлах болон дунд ангийнхан хичээллэж байх бөгөөд завсарлагааны цаг таарч, чимээ шуугиантай байлаа. Тус сургууль бага болон дунд, ахлах гэсэн хоёр хэсэг хичээлийн байртай. Бага ангийн хичээл хараахан эхлээгүй байсан болохоор цагаасаа түрүүлж ирсэн сурагчид хашаан доторх сандал дээр сууж, зарим нь гүйлдэн тоглоно. Тэдний нэг V ангийн сурагч Г.Амин-Үжингээс танхимаар хичээллэх ямар байгаа талаар асуухад “Сургуульдаа явах гоё. Цахим хичээлээ сайн ойлгохгүй, зарим үед үзэж амждаггүй. Харин танхимаар хичээллэхэд найзуудтайгаа уулзахаас гадна багшаасаа ойлгохгүй зүйлээ асуудаг. Ээж, аав маань байнга амны хаалтаа зүүж, гараа ариутгахыг зөвлөж байгаа” гэж ярьсан юм. Биднийг ийн ярилцах зуурт жижүүр багш бололтой эмэгтэй “Хүүхдүүдээ ороорой” хэмээн дуудаж, тэднийг улавч өмсөхийг сануулж, халууныг нь хэмжин, гарыг нь ариутган дотогш оруулав. Танхимаар хичээллэж байхад коронавирусийн халдвар илэрвэл эхлээд хянах ёстой хүн бол сургуулийн эмч. Ер халдвар гэлтгүй сурагчдын бие өвдөж, ханиалгах, халуурсан тохиолдолд нэн тэргүүнд эмч үзэх ёстой.

     Үүнтэй холбоотойгоор нийслэлийн ерөнхий боловсролын I сургуулийн эмч М.Отгончимэгээс  тус сургууль дахь өвчлөл болон зарим зүйлийн талаар тодруулсан юм.  Тэрбээр “Манай сургууль нийт 3742 сурагчтай. Нийт сурагчдын 50 хувь буюу нэг ээлждээ 1900 хүүхэд танхимаар хичээллэж байгаа. Манай сургуулийн хувьд бага ангийн 4-5 анги цахим хэлбэрт шилжсэн. Дунд ангиас цахимд шилжсэн анги байхгүй. Учир нь нэг хүүхэд гэртээ өвдлөө гэхэд бусад хүүхдүүдэд тандалт аваад тухайн хүүхдүүдийг гэрт нь тусгаарлах зохицуулалт хийж байна” гэлээ.

-БАГШ НАРЫН 70 ХУВЬ НЬ КОРОНАВИРУСИЙН ХАЛДВАР АВСАН-

    Мөн Чингэлтэй дүүргийн XVII сургуулиар орж халдварын нөхцөл байдал болон багш, сурагчдын халдварын талаар мөн тодруулав. Биднийг очиход тус сургуулийн нэгдүгээр ээлжийн хичээл тарж, хоёрдугаар ээлж нь оржээ. Мөн л үүдэндээ тухайн өдрийн жижүүр багш гар ариутгаж, халуун хэмжиж байв. Сургуулийн үйл ажиллагааны талаар тус сургуулийн Монгол хэл, уран зохиолын багш Б.Шинэжил “Сурагч болон багш нарын халдвар ихсэж байна. Манай сургуулийн багш нарын 70 хувь нь халдвар авсан. Багш нар ковид тусахаар нөхөж хичээлийг нь орж байгаа тул зарим багшийн ачаалал ихсэж байгаа. Нөгөө талаар сурагчдын хоцрогдол их байна. Өмнөх жилийг бодоход хэдийгээр цахим, танхим хосолсон хэлбэрээр хичээллэж байгаа ч хүүхдүүдийн хичээлдээ хандах хандлага өөр байна. Тухайлбал, цахим долоо хоногт зарим хүүхдэд “Гэрт нь интернэт байхгүй” гээд огт хичээлдээ суухгүйгээр танхимын сургалтдаа ирдэг. Ингэснээр хоцрогдол арилах биш харин ч нэмэгдэж байна” гэсэн юм. Ийнхүү сургуулиуд цар тахлын онцгой нөхцөлд тогтоосон журмын дагуу сургалтын үйл ажиллагаагаа явуулж байна.

Д.БЯМБАСҮРЭН