Долдугаар сарын 12. Өдрийн 12:00 цаг. Улаанбаатар хотоос баруун аймгуудын зүг гарах “22-ын товчоо” ачаалалтай байлаа. Гурван эгнээ замаар цуван, Улаанбаатараас гарахын түүс болсон иргэд машинтайгаа дугаарлана. Сонгинохайрхан дүүргийн Замын цагдаагийн хэлтсийн ахлах ахлагч, зохицуулагч А.Батбаатарын мэдээлснээр өглөөнөөс хойш хоёр мянга орчим машин нийслэлэээс гарчээ.

      Аймаг орон нутаг руу, аялаж зугаалах бүү хэл Туулын эрэг дээр сэрүүцэж, цэвэр агаарт амрах эрхээ ч хумиулж байсан иргэд энэ баяр наадмын амралтын өдрүүдээр хөдөө тийш яарч байна. Жил бүр хот хоосорч, иргэд амралт, зуслан, орон нутгийн чиглэлд зорчдог ч энэ жил өмнөхөөсөө ч олон хүн замд гарч байгааг албаны хүн хэлэв. Баяр наадмын эхний өдөр гэхэд зөвхөн "22-ын товчоо"-гоор 7000 гаруй автомашин гарчээ. Эндээс нэг автомашинд зорчих иргэдийн тоог бодвол, өдрийн дотор зөвхөн баруун аймгийн чиглэлд 20 мянга орчим хүн нийслэлээс гарч байна гэсэн үг. Ялангуяа баруун зүгт зорчигчдын дайран өнгөрөх үзэсгэлэнт байгальтай нутаг болох Архангай, Өвөрхангай, Баянхонгор, Ховд аймгийн зам ачаалалтай байгааг орон нутаг дахь Замын цагдаагийн газраас мэдээлэв.      Гурван эгнээ замд, уртаас урт дугаарласан автомашинууд нийслэлээс  гарахаар чихэлдэх зуурт хаа нэг, ганц хоёрхон машин л Улаанбаатарын төв рүү нэвтэрч байлаа. Эл өдрүүдэд орон нутгаас нийслэл рүү нэвтрэх автомашины тоо 100 -130 болж буурчээ. Орон нутгаас ирж буй жолоочдын дархлаажуулалтын гэрчилгээг шалган нэвтрүүлж байв. Харин нийслэлээс гарч буй иргэдийн дархлаажуулалтын гэрчилгээ, ковид тусч, эдгэсэн бол эмчийн магадлагаа, хүүхдүүдийн төрсний гэрчилгээ, дархлаажуулалтад бүрэн хамрагдаагүй бол түргэвчилсэн шинжилгээний хариуг шалгаж байлаа. Мөн хамгаалалтын бүсээ зүүж, хүүхдүүдээ зориулалтын суудалд суулган аюулгүй тээвэрлэх, хурд хэтрүүлэхгүй, тайван зорчихыг анхааруулна.  Арын суудалд зорчигчдын дийлэнх нь хамгаалалтын бүс зүүгээгүй бөгөөд дугаарлан зогсохоос уйдсан хүүхдүүд цонхоороо толгойгоо гаргаж, гараа унжуулан, орчныг ажих нь эрсдэлтэй санагдлаа. Тиймээс ч Тээврийн цагдаагийн албанаас  “Ирээдүйгээ хамгаалъя” аяны хүрээнд автомашины суудлын бүс тохируулагчийг, аюулгүй зорчих зөвлөмж бүхий стикерийн хамт тарааж, анхааруулга зөвлөгөө өгч байв.

      Бага үдийн халуунд урт дараалалд зогсох автомашинтай иргэдэд нэгэн эмэгтэй, залуу хүүгийн хамт хуушуур зарж байлаа. Тэд өнөөдөр анх удаа товчоогоор гарч буй иргэдэд хуушуур зарж байгаа гэнэ. Гарах пост дээр түгжирч байгаа иргэдэд наадмын хуушуур зараад үзвэл яасан юм бэ гэсэн тэдний санаа оносон мэт.

     Бүх нийтээр амрах хуультай, нэлээд хэд хоногийн хугацаатай, цалинтай зугаалганы энэ үед товчоо дагасан өөр нэгэн бяцхан бизнес амжилттай явж байна. Тэр бол хонь зарах үйлчилгээ юм. Зуу гаруй хонийг дөрвөн талаас нь хашиж зогсоод зам зуурт нь зарж байлаа. Хээр гадаа очиж хийх шинэ шөл, сайхан хорхогныхоо махыг зам зуураасаа авчих нь амар биз. Тиймээс ч хонь зарж буй хэдийг харсан иргэд засмалаас гарч, шороон замаар тоос татуулан давхиж очоод наймаа хийж харагдана. Энд шүдлэн хонь 190 мянган төгрөгөөр зарж байсан бөгөөд хаанахын хонь гэдгийг асуувал үл  наймаачин эр Завханых гэв.

     Ийнхүү Улсын баяр наадмыг цахимаар тэмдэглэхийг азнаж, хойтон жилийг хүлээхээр болсон ч бүх нийтийн амралтын өдрүүдийг хэвээр үлдээснээр орон нутгийн зүг зорчих иргэн олон байна. Эрүүл мэндийн сайд С.Энхболд “Энэ үед хөдөлгөөний нягтаршлыг бууруулж, иргэдийг гэр бүлийн хүрээнд амрах нөхцөл бүрдүүлнэ” гэсэн билээ. Тийнхүү долдугаар сарын 9-нөөс 13 аймгийн 101 сум зорчих хөдөлгөөнөө нээж, аймгууд ар араасаа нийслэл хотынхноо хүлээн авахаа мэдэгдсэн юм.

Б.БАДАМЗУЛ