Ганц хүүгийнхээ алтан шарилд ч хүрч чадахгүй, арга ядахдаа "Улаанбаатар буян" компанийн цементен хашаанд мөргөж байсан аавын зургийг уншигч та санаж байгаа биз ээ. Түүнээс хойш олон аав хүүгээсээ, охиноосоо өнчирч хоцорлоо. 

  “Буяны хөсөг” гэсэн бичигтэй машин дотроос битүү баглаж, цагаан өнгийн хамгаалалтын хувцас өмсгөж, эргэн тойрон хүлсэн ковидтой цогцосыг өвчтөн зөөдөг тэргэн дээр ачлаа. Ариутгагч, ачигч нар тэргээ түрээд  хөдлөхөд хоёр охин “Ааваа үүрд хайртай шүү. Ааваа сайн яваарай” хэмээн цурхитлаа уйлах. Араас нь нэг эмэгтэй “Ганцхан удаа царайг нь харуулаач дээ” гээд газар сөхрөөд унав. Талийгаачийн ах, дүү нар бололтой 10 гаруй хүн уйлалдаж, цогцос чандарлах зуухны хаалга чигтээ сүү өргөж зогсоно. Мөн үүнээс гадна хоёр ч гэр бүлийнхэн ХӨСҮТ-ээс ирж буй буяны хөсгийг хүлээж зогссон юм.

       Аавынхаа алтан шарилд ч хүрч чадахгүй, эмнэлгийн хаалгаар орсон цагаас нь хойш царайг нь харж, хоолойг нь сонсоогүй охид ийн хашааны цаанаас аавтайгаа салах ёс хийж буй нь энэ. Хайртай хүнийхээ мөрийг нь ч түшэж чадалгүй, хорвоогоос явсан царайг нь ч харах эрхгүй ах дүү нарынх нь дүр зургийг “Улаанбаатар буян” компанийн гадна талбайгаас харлаа. Шарил ачсан буяны хөсгийг харж, талийгаачийнхаа хайрцганд хийх эд зүйлийг хар торонд хийгээд, сүүлчийн замд нь үдэхээр тэд “Улаанбаатар буян” компанийн цементен хашааны буланд өөрийгөө барьж ядан зогсоно. Охин нь аавынхаа хөргийг хүрэн бор жаазанд хийж, цэнхэр өнгийн хадганд ороон алхаж байлаа. Харин нэг охин шарил ачсан машины зургийг авч, бичлэг хийж байсан юм. 

            Бид “Улаанбаатар буян” компаний гадна талбайд зургадугаар сарын 4-нд буюу коронавирусийн халдвараар хамгийн олон хүн нас барсны маргааш нь очсон нь энэ. Номын дуу цуурайтаж, цаг тутамд машин холхилдож, арц хүж хөндий дүүрэн уугиж байлаа. “Буяны хөсөг” гэх бичигтэй хар өнгийн машин “Улаанбаатар буян” компанийн төв хаалгаар орж, хамгийн баруун талд байрлах цогцос чандарлах зуухны үүдэнд очиж зогсдог юм байна. Цагаан өнгийн хамгаалалтын хувцас өмсөж, цэнхэр савтай ариутгалын бодис үүрсэн таван ариутгагч буяны хөсгийг тосож, жолооч нь бууж ирээд, албан бичиг бололтой цагаан цаас өгөөд, ачиж ирсэн цогцосоо “тушаадаг” аж.

Талийгаачийн гэрийнхэн буяны хөсгийн арын хаалга онгойхыг, аавынхаа цогцсыг харахыг сэтгэл түгшин хүлээж, талийгаачийнхаа хайрцган дотор хийх эсгий, аяга, идээ будаа гэх мэт зүйлийг уутанд хийн “Улаанбаатар буян” компанийн хашаан дээгүүр сарвайна. Мөн хадаг өгч “Биенээс нь уяад өгөөрэй” хэмээн гуйж байгаа харагдав.

    Амьдралынх нь түшиг тулгуур, ноён оргил болсон аавынхаа алтан шарилыг мөн эсэхийг ч харах эрх тэдэнд үлдээгүй. Хамгаалалтын цагаан хувцсанд эргэн тойрон боосон цогцсыг аавыгаа л гэж итгэхээс тэдэнд өөр сонголт байхгүй нь дэндүү харамсалтай.

Коронавирусийн халдвараар нас барсан иргэдийг чандарлаж, цогцсыг нь хайрцаг, бунханд хийх хоёр сонголттой аж. Хүмүүс ихэнхдээ хайрцганд хийж, газарт оршуулах сонирхолтой байгаа гэнэ. Тэд талийгаачийгаа “Улаанбаатар буян” компанийн ногоон байшин руу орсны дараа эргэн эргэн харсаар машиныхаа зүг алхаж одов.

      Нэг л өдөр хаанаас ч хамаагүй халдвар авч, хайртай хүнтэйгээ эргэж уулзахгүй ч байж мэдэх цаг хугацаанд амьдарч байгаа иргэн та бид өөрсдийгөө өөрөө л хамгаалж чадна шүү. Ковид бол аюулт цар тахал гэдгийг ойлгож, хэн нэгэнд найдалгүй өөрийгөө, хайртай бүхнээ эрсдэлээс хамгаалаарай. Хайртай хүнийхээ баруун өвдөгнөөс ч адис авч чадахгүй, эргэн төрөхөд нь таних тэмдэг ч тавьж чадалгүй, харуусал, гунигаар дүүрэн одож байгаа 300 гаруй айлын зовлонг дахиж хэн ч битгий амсаасай...