Монгол Улсын Засгийн газрын ээлжит хуралдаан өнөөдөр боллоо. Засгийн газрын ээлжит хуралдаанаар МУБИС, ШУТИС-ийг Баянхошуу дэд төв рүү нүүлгэх санал гаргажээ. Тухайлбал, нийслэлд хэрэгжиж буй зургаан дэд төвийн төслийн нэг болох Баянхошуу дэд төв рүү МУБИС, ШУТИС-ийг нүүлгэх саналыг хотын захиргаанаас гаргаж, холбогдох салбар яамдад саналаа хүргүүлээд байгаа аж. Энэ талаар Нийслэлийн Засаг дарга бөгөөд Улаанбаатар хотын захирагч Х.Нямбаатар "Баянхошуу дэд төв дээр 160 га газрыг барилгажуулах төлөвлөгөөтэй. Үүний 60 газарт нь нийслэл гадаадын ногоон орон сууцны төслөөр зургаан мянган айлын орон сууц барих төлөвлөгөөтэй байгаа" гэв.

Баянхошуу дэд төвд өдгөө 800 айлын орон сууц баригдаж байгаа бөгөөд нийт 1700 айлын орон сууц баригдах дэд төвийн төсөл юм.