Зам засвар, шинэчлэлтийн ажлын талаар Нийслэлийн Засаг дарга бөгөөд Улаанбаатар хотын захирагч Х.Нямбаатар мэдээлэл өглөө.

Тэрбээр “Улаанбаатар хот жилд дунджаар 15 километр зам засаж, шинэчилдэг байсан бол энэ жил 162 километр зам шинэчлэхээр төлөвлөгөө гарган ажиллаж байгаа. Энэ жил бид бонд гаргаж автозамаа шинэчилье, иргэдийн автомашиныг эвдрэхээс сэргийлье гэж зам засварын иж бүрэн шинэчлэлийг хийхээр төлөвлөсөн. Өөрөөр хэлбэл энэ жил болон ирэх жилийн эхний хагас гэхэд Улаанбаатар хотыг нэг ч эвдэрсэн замгүй болгохоор ажиллаж байна. Зам засварын ажил орой эхэлсэн нь шалтгаантай. Бид зургадугаар сард бонд гаргах эрхээ авч, тендерээ гаргасан. Хамгийн эхний тендер долдугаар сарын 28-нд шалгарсан. Бид технологийн горим алдахгүй хөрсөн дээр 0 хэм хүрэхээс өмнө зам засварын ажлаа дуусгана. Өдөр бүр зам нээж байгаа. Ойрын хугацаанд яармагийн замыг хэсэгчилж хаана. Сүүлийн 10 жилд Улаанбаатар хотод зам засварын дорвитой ажил хийгдээгүй. Арваннэгдүгээр сар хүртэл бид төлөвлөсөн ажлынхаа 70 хувийг хийж дуусгана. Зам засварын ажил хийснээр автомашины хурд, эрчим нэмэгддэг гэсэн судалгаа бий. Бродюртой холбоотой гомдлыг хүлээн авч стандартад өөрчлөлт оруулж, эвдрэлгүй бродюрыг заавал солихгүй байхаар шийдсэн” гэв.