Нийт нутгаар хүйтэрч, тариалангийн бүс нутгаар цас орох талаар холбогдох байгууллагаас мэдээлсэн. Иймээс ЦУОШГ-ын технологич, инженер С.Батбаяраас ойрын өдрүүдийн цаг агаарын нөхцөл байдлын талаар тодрууллаа.

Тэрбээр "Есдүгээр сарын 18-нд өдөртөө баруун аймгуудын нутгийн зарим газар, төвийн аймгуудын нутгийн баруун болон хойд хэсгээр бороо, нойтон цас орно. Бусад нутгаар багавтар үүлтэй, хур тунадас орохгүй. Баруун болон төвийн аймгуудын нутгаар салхи баруун өмнөөс баруун хойш эргэж, зарим газраар секундэд салхи 16-18 метр хүрч ширүүсэх юм. Бусад нутгаар салхи баруун өмнөөс секундэд 7-12 метр хүрнэ.

    Есдүгээр сарын 19-20-нд шилжих шөнө газар тариалангийн бүс нутгаар хөрсөн дээр цочир хүйтэрнэ. Есдүгээр сарын 19-нд төвийн аймгуудын нутгийн зарим газар, говийн аймгуудын нутгийн зүүн хэсэг, зүүн аймгуудын ихэнх нутгаар, 20-нд Хангайн уулархаг нутаг, Дарьгангын тал газраар бороо, нойтон цас орно. Есдүгээр сарын 19-нд  говь тал нутгаар салхи түр зуур секундэд 16-18 метр хүрч ширүүснэ. Шөнөдөө Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр  хасах 6-11 хэм хүйтэрч, Хэнтийн уулархаг нутаг Эг, Үүр, Орхон, Хараа, Ерөө, Туул, Тэрэлж, Хэрлэн голын хөндийгөөр цочир хүйтэрч 0-5 хэм хүрнэ. Өдөртөө 5-10 хэмийн дулаан. Есдүгээр сарын 21-нд нутгийн баруун хэсгээр болон ихэнх нутгаар дулаарна" гэв.