Засгийн газрын хуралдаанаас гаргасан шийдвэрүүдийг танилцуулж байна. Энэ үеэр Нийслэлийн Засаг дарга бөгөөд Улаанбаатар хотын захирагч Х.Нямбаатар мэдээлэл өглөө.

Тэрбээр “Тавдугаар сард Хот, тосгоны эрх зүйн байдлын тухай хууль, түүнийг дагасан хуулиуд батлагдсан. УИХ-ын тогтоолоор Улаанбаатар нь дөрвөн хот, 14 дагуул хотоос бүрдэнэ. Үүнтэй холбоотойгоор суурьшлын бүсийн тэлэлт, газар зохион байгуулалт, дэд бүтэц, газар ашиглалт, хориглолт хамгаалалтын бүс, үйлдвэрлэлтийн бүсийг шинэчлэн тогтоох шаардлагатай болсон. Улаанбаатар хотыг 2040 он хүртэл хөгжүүлэх ерөнхий төлөвлөгөө батлагдсанаар төрийн болон хувийн байгууллагууд ерөнхий төлөвлөгөөний дагуу хөрөнгө оруулалтаа шийднэ. Хөгжлийн бодлогын баримт бичиг батлагдсаны дараа Улаанбаатар хотын хэсэгчилсэн ерөнхий төлөвлөгөө батлагдана. Мөн барилгажилтын төлөвлөгөө батлагдсанаар хотод дахиж замбараагүй, хэт нягтаршилтай барилга барихгүй. Улаанбаатар хотын хүнд ээлтэй байж чадаагүй алдааг засна. СХД-ийн 21 дүгээр хороо буюу Жаргалант тосгоныг хот орчмын хүнсний хангамж, хүнсний бүтээгдэхүүнийг үйлдвэрлэдэг татварын хөнгөлөлттэй бүс болгон "Агро сити" дагуул хотыг байгуулна. Мөн зуслангийн бүсийг Шаргаморьт хот болгоно.