Нэрт зохиолч, яруу найрагч, судлаач, шүүмжлэгч, хэл бичгийн ухааны доктор П.Батхуяг агсны 50 насны ойд зориулсан уран бүтээлийн 50 дахь шинэ ном, “Залбирал” уран зураг, яруу найрагчдын гар бичмэлийн үзэсгэлэн өнөөдөр Д.Нацагдоржийн нэрэмжит Улаанбаатар хотын нийтийн номын санд нээлтээ хийлээ.

Тус номыг 41 дэх удаагийн Болор цомын эзэн яруу найрагч С.Начин багшийнхаа 50 насны ойд зориулан, 1998 онд “М.Ширчинсүрэнгийн яруу найргийн төрөл зүйл уран чадварын асуудал”  сэдвээр магистрын зэрэг хамгаалж байсан бүтээлээр нь ийн 50 дахь ном болгон баринтаглан хүргэж байгаа юм байна.

П.Батхуяг агсны хувьд утга зохиолын хүрээнд Момо багш хэмээн алдаршсан.Тэрээр тууж, өгүүллэг, жүжгийн зохиолд цахиур хагалж, сэтгэлгээний яруу найргийг шинэ түвшинд хүргэсэн.   1990-ээд оны дунд үед утга зохиолын “Хүрээ хөвгүүд” бүлгэмийг үүсгэн байгуулалцаж, хүүрнэл зохиол, яруу найраг, жүжиг, кино зохиол, утга зохиол судлал, шүүмж" гээд уран зохиолын бүхий л төрлөөр бичиж, бүтээл туурвилын гэгээн ертөнцөд ухамсарт амьдралаа зориулсан нэгэн юм.

 “Залбирал” үзэсгэлэн есдүгээр сарын 16-23-ны өдрүүдээр Д.Нацагдоржийн нэрэмжит Улаанбаатар хотын нийтийн номын санд дэлгэгдэнэ.