Хууль зүй, дотоод хэргийн сайд О.Алтангэрэл, ШШГЕГ-ын дарга, хурандаа Б.Нандинболор тэргүүтэй албаны төлөөлөл өнөөдөр “Парис-2024” олимпын мөнгөн медальт, Монгол Улсын Гавьяат тамирчин, ШШГЕГ-ын харьяа “Сүлд” спорт хорооны тамирчин, дэд ахлагч Б.Баасанхүүг хүлээн авч, уулзан хүндэтгэл үзүүлжээ. Уулзалтаар салбарын зүгээс олимпын мөнгөн медальт Б.Баасанхүүд гурван өрөө байр олгох батламж гардуулсан байна.

Ташрамд дурдахад, Б.Баасанхүүг өнөөдөр төрийн дээд шагналт Гавьяат тамирчин цол, тэмдгээр шагнасан бөгөөд тэрбээр “Монгол Улсын Гавьяат тамирчин цолоо хамгаалж бэлтгэл сургуулилтаа сайн хийх болно. Монгол Улсын Ерөнхийлөгч шагнал гардуулж байхдаа “Удахгүй Хөдөлмөрийн баатар болоорой” гэсэн. Олимпын мөнгөн медаль хүртэж байх үед бахархах мэдрэмж төрсөн. Төрийн далбаагаа мандаж харах сайхан байсан. Би төрийн дууллаа эгшиглүүлж чадаагүй ч бусад тамирчид минь эгшиглүүлээсэй гэж чин сэтгэлээсээ хүссэн” хэмээн сэтгэгдлээ илэрхийлсэн юм.