Үндэсний цэцэрлэгт хүрээлэнгийн ОНӨТҮГ-ын дарга Ү.Оюунзулын оронд мисс Ё.Нямжав томилогдоод гурав хонож буй. Түүнийг дарга болсон даруйдаа олон хүнийг ажлаас нь халсан гэх асуудал үүсэж байгаа. Энэ талаар Ё.Нямжав өөрийн цахим хаягтаа тайлбар оруулж, өмнө нь ажиллаж байсан Ү.Оюунзулыг хангалтгүй ажилласан байна хэмээн шүүмжилжээ. Тодруулбал, “Намайг дарга болсноос хойш жилийн бүх худалдан авалтаа өөрөө хийдэг нэг дарга, хэдэн сараар орлогоо тасалж, үндсэн ажлаа умартсан мөн нэг дарга өөрсдийн хүсэлтээр ажлаа өгсөн. Ганц хогийн машин авчих сэтгэлгүй, усжуулалт, цахилгааны шийдэж чадаагүй 12 жил болсон газар байна. Орчин үеийн цэцэрлэгт хүрээлэн болгоход үнэндээ хол байна. Төсөв мөнгийг нь шийддэг газрууд анхаармаар байна. Дашрамд хэлэхэд мисс гэдэг чинь мэргэжил, ур чадварын нэр, хэмжүүр биш” гэжээ. 

   Тэгвэл Үндэсний цэцэрлэгт хүрээлэнгийн ОНӨТҮГ-ын даргаар томилогдоод удаагүй байгаа Ё.Нямжавыг танилцуулж байна. Тэрбээр "Монголын сайхан бүсгүй-2001" улсын уралдааны алтан эрдэнийн өргөмжлөлт мисс билээ. Шанхай дахь Ерөнхий консулаар ажиллаж байгаад өнгөрсөн жил эх орондоо ирсэн. Мөн Сүхбаатар дүүргийн социал демократ Монголын эмэгтэйчүүдийн холбооны даргаар ажиллахын зэрэгцээ МАН-ын Ерөнхий нарийн бичгийн даргын Гадаад бодогын орон тооны бус зөвлөхөөр ажиллаж байжээ. Тэрбээр сэтгүүлч мэргэжилтэй. Завхан аймагт төрж, өссөн.