Монгол Улсын Засгийн газрын 2023 оны есдүгээр сарын 26-ны өдрийн 357 дугаар тогтоолоор баталсан “НҮБ-ын Хүний эрхийн зөвлөлөөс гаргасан зөвлөмжүүдийг 2023-2025 онд хэрэгжүүлэх ерөнхий төлөвлөгөө”-ний хэрэгжилтийг хангах, хэрэгжилтэд хяналт тавих үүрэг бүхий Орон тооны бус зөвлөлийн хуралдаан 2024 оны нэгдүгээр сарын 10-ны өдөр Гадаад харилцааны яаманд боллоо.

Зөвлөлийн анхдугаар хуралдааныг Гадаад харилцааны яамны Төрийн нарийн бичгийн дарга Н.Анхбаяр даргалж, НҮБ-ын Хүний эрхийн зөвлөлөөс гаргасан зөвлөмжүүдийн хэрэгжилтийн тайлангийн төслийг хэлэлцэж, гишүүд санал, мэдээллээ солилцлоо.

Монгол Улс хүний эрхийн төлөв байдлын талаарх үндэсний гуравдугаар илтгэлээ 2020 онд Хүний эрхийн төлөв байдлын нэгдсэн хэлэлцүүлгийн Ажлын хэсгийн 36 дугаар чуулганаар хэлэлцүүлж, хамгаалсан. Түүний мөрөөр дунд хугацааны тайланг ирэх хоёрдугаар сард НҮБ-ын Хүний эрхийн зөвлөлд хүргүүлнэ.