Цсан шуурганы улмаас Хэнтий, Сүхбаатар аймгаас Улаанбаатар руу зорчих авто зам боогджээ. Үүссэн нөхцөл байдлын талаар Сүхбаатар аймгийн Засаг дарга М.Идэрмөнхтэй холбогдож тодрууллаа.

 Тэрбээр “Ойролцоогоор 30 цаг гаруй үргэлжилж байгаа цасан шуурганы улмаас авто зам цасанд дарагдсан байдалтай байна. Мөнххаан суманд цас хунгарлаж шуурдаг хоёр хэсэг бий. Тэнд хунгарласан цасыг цэвэрлэж, авто замыг цэвэрлэж байгаа. Гэхдээ цасан шуурга үргэлжилж байгаа учраас дахин цас хунгарлаад байна. Зарим суманд цасанд боогдсон, шатахуунгүй болсон гэсэн дуудлагууд ирсэн. Албаныхан дуудлагын дагуу шуурхай ажиллаж байгаа” гэв.

2024 оны нэгдүгээр сарын 10-ны 08:00 цагийн цаг агаарын ажиглалтын мэдээгээр:

        Сүхбаатар аймгийн нийт нутгаар цас ороогүй. Ажиглалтын талбайн мэдээгээр Түмэнцогт сум 25см, Асгат сум 23см, Баяндэлгэр, Дарьганга сум 18см, Мөнххаан, Сүхбаатар, Наран сум 17см, бусад сумдаар 11-16см цасан бүрхүүлтэй.  Салхи нийт нутгаар баруун өмнөөс 8-13м/с,  түр зуур 12-18м/с хүрч ширүүсэж, цасан шуурга шуурч байна.  Сүхбаатар, Баруун-Урт, Асгат сумдаар алсын барааны харагдац 2км дотор. Агаарын температур -9...-13 градус хүйтэн байна.

Нэгдүгээр сарын 10-ны 20 цаг хүртэл нийт нутгаар салхи секундэд  8-13 метр, зарим үед 15-17м/с хүрч ширүүсэж цасан шуурга үргэлжлэх төлөвтэй байна.