Нийслэлийн түргэн тусламжийн төвд өнгөрсөн арванхоёрдугаар сарын 23-ны 04:50 цагт 47 настай эрэгтэй даралт ихэссэн гэх дуудлага, мэдээлэл өгчээ. Дуудлагын дагуу үзлэг хийхээр очсон эмч рүү тухайн иргэн хутга барьж дайрсан байна. Тухайн иргэнээс айсан эмч өөрийгөө хамгаалж, цонхоор үсэрч, баруун хөлөө хугалсан гэх мэдээлэл гарсан. Энэ талаар ЦЕГ-ын Хэвлэл мэдээллийн төвийн мэргэжилтэн, цагдаагийн хошууч Б.Дэлгэрхангайгаас тодрууллаа. Тэрбээр “Эмч рүү хутга барьж дайрсан иргэн тухайн үед согтуу байсан учир эрүүлжүүлэхэд хонуулж арга хэмжээ авсан. Мөн сэтгэцийн өөрчлөлттэй байж магадгүй учир СЭМҮТ-ийн эмч нарт хүлээлгэн өгсөн. Харин хөлөө хугалсан эмч тухайн үед цагдаад хөлөө гэмтээсэн болохоо мэдэгдээгүй байсан” гэв.