Шүүхийн шийдвэр гүйцэтгэх ерөнхий газрын харьяа Цагдан хорих 461 дүгээр хаалттай ангид цагдан хоригдож байгаа Б.Ганхуягийн биеээс хүнцэл илэрсэн болохыг түүний гэр бүлийн хуулийн байгууллагад мэдэгдэж, Мөрдөн байцаах албанаас мөрдөн шалгах ажиллагаа явуулсан байдаг. Шүүгдэгч Б.Ганхуягын биеэс  өнгөрсөн арваннэгдүгээр сард "Улаанбаатар сонгдо" эмнэлгийн Эрүүл ахуй, хор судлалын лабораторид сорилт шинжилгээ өгчээ.

Мөрдөн шалгах ажиллагааны явцад цугларсан нотлох баримтаар "Улаанбаатар сонгдо" эмнэлгээс цусанд илэрсэн 9,29 мкг/дл хүнцлийн хэмжээг нэгжид шилжүүлэхдээ алдаа гаргасан. Хүний биед хүнцэл 9200 дахин ихэссэн бол хүн амьд явах боломжгүй ба Г-аас авсан биологийн дээжид хийсэн 2023 оны 11 дүгээр сарын 29-ний өдрийн Эрүүл ахуй, хор судлалын шинжилгээгээр цусанд хүнцэл 9,26 мкг/дл, шээсэнд 0,86 мкг/дл, үсэнд 0,24 мкг/дл, мөн 2023 оны 12 дугаар сарын 14-ний өдөр давтан хийсэн “Хэлт энд сэфти солушинс” ХХК-ийн лабораторийн шинжилгээгээр цусанд 8,96 мкг/дл, үсэнд 0,22 мкг/г, шээсэнд илрээгүй зэрэг нь хүнцлийн хэмжээ зохих түвшинд байгаа нь тус тус тогтоогдсон гэдгийг албаны эх сурвалж мэдээлсэн. Энэ талаар “Улаанбаатар Сонгдо” эмнэлгээс тодруулахад “Б.Ганхуягийн бие дэх хүнцэлийн хэмжээг буруу тоолсон эсэх талаар мэдээлэл өгөх хүн байхгүй” гэв.