Хэвлэл мэдээлэл, сэтгүүл зүйн “Ган үзэг-2023” оны тэргүүн наадмын сэтгүүлийн шилдэг сэтгүүлчээр манай сайтын Эрэн сурвалжлах, шуурхай мэдээллийн албаны дарга Д.Чанцалдулам шалгарлаа. “Оюунлаг эргэлт медиа групп”-ийн дэргэдэх Эргэлт.мн мэдээллийн сайт 2022 оноос “Эргэлт” сэтгүүлийг эрхлэн гаргаж, уншигчдын хүртээл болгоод байгаа билээ. Сэтгүүлч Д.Чанцалдулам нь “Эргэлт” сэтгүүлд эрэн суравжлах даацтай сурвалжилга, ярилцлага, нийтлэл зэрэг сэтгүүл зүйн бүтээлүүдээрээ уншигчдын танил болж, сэтгүүлийн өнгө төрхийг тодорхойлж байгаа юм.

Сэтгүүлч Д.Чанцалдуламын “Эргэлт” сэтгүүлд нийлүүлсэн даацтай, уншууртай, эрэл хайгуул хийсэн шилдэг бүтээлүүдээс онцолбол, “Давс үүрсэн дөчин жил”, “Малайзад амиа алдсан Б.Энхтуяагийн ээж Б.Шархүү:Миний охиныг онц хэрцгийгээр хөнөөж, танихын аргагүй болгосон байхад “Амиа хорлолт” гээд орхисон” ярилцлага,  “Хувьцааны гол тоглогч буюу хогийн цэгийн тэрбумтан А.Чулуун”, “Амьдрах аврахын төлөөх тэмцэл”, “Дугархорлоогийн хэрэгт хэлмэгдсэн Ч.Уранчимэгийн охин Сайханжаргал: Хивсний хулгайч Мягмарт нүүр өгөөгүйнхээ төлөө миний ээж хүн амины хэрэгт гүтгэгдэж, 15 жилийн хорих ял сонссон”, ярилцлага “Хандгай нутагладаг Халх, нөмөргөөс...” тэмдэглэл, “Монголын төр утаагүй түлш үйлдвэрлэж, утаанд нь 7857 монгол хүн угаартаж, 150 нь амиа алдсан эмгэнэл”, “С.Амгалан: Миний гэр Монгол Улс, Би иргэн нь. Ингээд ойлгочиход л хангалттай биз дээ”, Хилс хэрэгт гүтгэгдэж, цагдаа нарт тамлуулж, шүүхээс хоёр удаа цаазын ял сонсохдоо 23-хан настай байлаа” зэрэг шилдэг бүтээл нь "Ган үзэг" хүртлээ. 

    Манай сайтын сэтгүүлч Д.Чанцалдулам нь улиран одож буй 2023 онд Монголын сэтгүүл зүйд мэргэжлийн мэдээллийн сайт, сэтгүүлийн сэтгүүлчийн өнгө төрхийг бий болгох үйлсэд оюун санаа, мэдрэмж, эрэл хайгуул, зогсолтгүй хөдөлмөрөө дайчилж, уншигчдын таашаалд нийцсэн шилдэг бүтээлүүдээрээ дээрх шагналыг хүртсэн гэдгийг дуулгахад таатай байна. 

"Ган үзэг-2023" наадмын сэтгүүлийн шилдэг сэтгүүлчээр шалгарсан Д.Чанцалдуламын онцлох сурвалжилга, нийтлэлийнх нь зарим зургийг хүргэж байна.