Нүүрсний хэргийг хянан шалгах түр хорооны дарга, ХЗДХ-ийн сайд Б.Энхбаяр Нүүсний сонсголыг хааж, үг хэллээ.

Тэрбээр “Ард иргэд, эрхэм гишүүдээ УИХ-ын 2023 оны 63 дугаар тогтоолоор “Тавантолгой” ХК болон “ЭТТ” ХК-ны нүүрс олборлолт, борлуулалт тээвэрлэлт, экспортын үйл ажиллагаа бусад бараа үйлчилгээ худалдан авалтад хяналт шалгалт хийх, нотлох баримтыг шинэчлэн судлах, нээлттэй сонсгол зохион байгуулах иргэд олон нийтийг мэдээллээр хангах хяналт шалгалтын тайланг 2023 оны намрын ээлжит чуулганаар багтаан танилцуулах үүрэг бүхий хянан шалгах түр хороо байгуулагдаж, өнөөдөр нотлох баримтыг шинэчлэн судлах сүүлийн хуралдааныг амжилттай зохион байгуулан өндөрлөлөө.

Монгол төрийн хуулийн биелэлтэй холбоотой нийтийн ашиг сонирхлыг хөндсөн тодорхой асуудлыг  ард түмний төлөөллийн байгууллагаас хянан шалгах эрх зүйн орчныг бүрдүүлэх зорилгоор 2019 онд Монгол Улсын Үндсэн хуульд оруулсан нэмэлт өөрчлөлтийн үр дүн бол УИХ-ын хянан шалгах түр хорооны үйл ажиллагаа юм. Энэ удаагийн хяналт шалгалтаар бид хууль зөрчсөн олон үйл ажиллагааг нотлох баримтын хамт иргэд олон нийтэд нээлттэй болгож чадлаа. Сонсгол хийх зам амар хялбар, дардан байгаагүй ээ. Түр хорооноос 2023 оны арванхоёрдугаар сарын 4-7, 18-22 өдрүүдэд зохион байгуулсан сонсголоор хянан шалгах түр хорооны 2023 оны арваннэгдүгээр сарын 27-ны өдрийн 19 дүгээр тогтлоор баталсан нотлох баримтыг шинэчлэн судлах дарааллын дагуу нийт 60 баримтыг  шинэчлэн судалсан бөгөөд нотлох баримтыг шинэчлэн судалсан шинжээчийн дүгнэлт хянан шалгагчдын тайланг сонсож, шаардлагатай нотлох баримтыг танилцуулсан.Мөн холбогдох гэрчүүдээс асуулт асууж, хариулт авсан. Гэрч, шинжээч, хянан шалгагчаас тайлбар авсан бөгөөд сонсголд давхардсан тоогоор нийт 577 гэрч дуудсанаас 419 нь ирж оролцсон. Улсын Ерөнхий Прокурорын Газар, Эрүүгийн Цагдаагийн Газрын Эдийн засгийн гэмт хэрэгтэй тэмцэх хэлтэс зэрэг төрийн байгууллагуудын албан тушаалтнууд оролцов. Монгол Улсад Засгийн бүх эрх ард түмний мэдэлд байна гэж Үндсэн хуульд заасныг та бид мэднэ ээ. Үндсэн хуулийг хэрэгжүүлж, ард түмний мэдэх эрхийг хангах зорилгоор зохион байгуулсан нүүрсний сонсголыг явуулахад саад болох өөр тийш чиглүүлэн таслан зогсоох оролдлого нүүрсний хулгайтай бүлэглэлээс удаа дараа ирж байсныг энд хэлье” гэв.