УИХ-ын ээлжит хуралдаанаар  "Эрдэнэс Тавантолгой", "Эрдэнэт" ТӨҮГ хувьчлах асуудлаар гишүүд байр сууриа илэрхийлж байна. Энэ үеэр УИХ-ын О.Цогтгэрэл гишүүн үг хэлж, асуулт асуулаа.

      Тэрбээр “Олон зөрчилтэй зохицуулалт орж ирж байна. Үндсэн хуульд заахдаа байгалийн баялгийн үр  өгөөжийг дийлэнх нь ард түмэнд ноогдож байх эрх зүйн үндсийг хуулиар тогтооно гэдэг. Энэ зохицуулалт тогтоолын төслөөр орж ирэх ёстой. Тогтоолын төсөлд “ЭТТ ХК-ын нийт хувьцааны 34 хувийг Монгол Улсын иргэн бүрд адил тэнцүү хэмжээгээр эзэмшүүлнэ” гэсэн байна. Хувьцаа эзэмшүүлнэ гэдэг ямар ойлголт байна. Эзэмших гэдэг нь төрөөс тодорхой цаг хугацаа, нөхцөл буцах эрхтэйгээр байгаа харилцааг хэлдэг. Энэ хувьцааг хэзээ нэг өдөр буцаагаад авчих юм уу. Өмчлөх биш юм уу.2011 оноос хойш дансанд бичилт хийж, данс руу нь мөнгө явуулдаг зүйлээсээ сургамж аваагүй байна. Хэтрүүлээд хэлэхэд энэ бол залилан. Баялагийн сан гэдэг зүгээр нэг данс биш. Сонгуульд бэлдсэн, хаврын чуулганаар ноогдол ашиг нэртэй хэдэн төгрөг данс руу нь хийх гэж байгаа зүйл. Яг үнэндээ энэ компани ноогдол ашиг олгох хэмжээнд ажиллаагүй” гэв.