"Цөмөөхэй" балетын бүжигчид ДБЭТ-т тоглолтын бэлтгэл хийхээр очсон ч бэлтгэл хийлгэлгүй хөөж гаргасан гэх мэдээлэл цахим сүлжээнд түгээд байна. Үүнтэй холбоотойгоор “Цөмөөхэй” балетын найруулагч, Гавьяат жүжигчин Д.Алтанхуягтай холбогдож  тодрууллаа.

                         Тэрбээр “Дуурь бүжгийн эрдмийн театр дээр өнөөдөр 17:00 цагаас “Цөмөөхэй” балетын бэлтгэл хийх хуваарьтай байсан. Балетад нийт 150 гаруй хүүхэд оролцдог юм. Харин өнөөдөр нэгдсэн бэлтгэл хийх гээд хүүхдүүдтэйгээ очтол ДБЭТ-ын захирал Б.Сарантуяа “Бэлтгэл хийлгэхгүй” гээд гаргачихлаа. Ямартай ч би хүүхдүүдээ явуулчихаад сууж байна. Сонгодог урлагийн театрын захирал хүн "Тоглолт хийх өдрөө ирж, тоглолтоо хийгээд яв" гэж хэлсэн. Доод албан тушаалтнууд нь "Бэлтгэл болно" гэж хэлээгүй учраас бэлтгэл хийлгэхгүй гэсэн. Яах ёстойгоо мэдэхгүй байна” гэв.