Өнгөрөгч 2022 онд Булган аймгийн Засаг дарга Б.Ариун-Эрдэнэ тухайн үеийн Нэгдсэн эмнэлгийн дарга П.Оюунцэцэгийн хамт БНСУ-ын Сөүл хот дахь Сон-Э эмнэлэгтэй эрүүл мэндийн тусламж үйлчилгээг харилцан хөгжүүлэхийн төлөө хамтран ажиллах гэрээ байгуулсан.

    Тус гэрээ нь Булган аймгийн Нэгдсэн эмнэлэг, Сөүл хот дахь Сон-Э эмнэлгийн хооронд эмчилгээ оношилгооны хувьд хамтран ажиллах тогтолцоог бүрдүүлж, иргэдийн эрүүл мэнд, эмчилгээний чанарыг дээшлүүлэн дэмжлэг үзүүлэхэд чиглэгджээ.

        Мөн гэрээнд тусгагдсан Нэгдсэн эмнэлгийн эмч сувилагч, эмнэлгийн тусгай мэргэжилтэнг Сон-Э эмнэлэгт урт болон богино хугацаатай сургалтад хамруулах ажлын хүрээнд Эрчимт эмчилгээ, яаралтай тусламжийн тасгийн сувилагч Н.Олдошгүй, Хүүхдийн тасгийн сувилагч Ц.Уранчимэг, Дотор, арьсны тасгийн ахлах сувилагч Э.Номинтуул нар энэ сарын 19-нд явахаар болж, Аймгийн Засаг дарга Б.Ариун-Эрдэнэ болон бусад удирдлагуудтай уулзлаа.

Энэ үеэр Аймгийн Засаг дарга хамтын ажиллагааны хүрээнд мэргэжил мэдлэгээ дээшлүүлэн, хариуцлагатай байж гэрээний үүргээ биелүүлэн дараагийн очих хүмүүстээ гүүр болохыг хүсэж, амжилт хүслээ.