УИХ-ын чуулган хуралдаж байна. Чуулган эхлэхээс өмнө үг хэлэх хүсэлт гаргасан гишүүдийн үгийн сонсож байна. Энэ үеэр УИХ-ын гишүүн Х.Болорчулуун гишүүн үг хэллээ.

Тэрбээр “УИХ нэг зөв зүйтэй тогтоол баталж гаргасан нь Хүнсний хангамж, аюулгүй байдлын тухай 36 дугаар тогтоол. Үндэсний үйлдвэрлэлээ дэмжих, хийж чадаж байгаа, чадах зүйлээ дотоодоосоо хангах тогтоолын гаргасан. Өнөөдрийн байдлаар хөдөө аж ахуй болон хүнсний үйлдвэрлэл эрхэлдэг компаниудад 700 тэрбум төгрөгийн зургаан хувийн хүүтэй зээл олгогдсон. Зөвхөн зээл олгосноор энэ асуудал шийдэгдэхгүй. Баялаг бүтээгчид маань хэлж байна. Бараа бүтээгдэхүүнээ борлуулахад төрийн хамгаалалт хэрэгтэй байна. Гадаадаас нэмэлт өртөг шингэсэн бүтээгдэхүүн орж ирээд байна. Энэ дээр таван хувийн татвар хамгаалалт болж чадахгүй байгааг хэлж байна. Импортын татварын шууд нэмэхгүй. Одоо байгаа таван хувийн татварыг жил бүр таван хувиар нэмж 2026 он гэхэд 20 хувьд хүргэх хэрэгтэй. Хийж үйлдвэрлэж чадахгүй зүйлүүд дээрээ татвар тавих хэрэггүй. Бид хэрэглээний орон болоод байна, үйлдвэрлэгч биш. Иргэдэд тэтгэмж биш, ажлын байр  хэрэгтэй. С.Ганбаатар гишүүн ордны гадаа зогсож байгаа эмэгтэйн талаар ярьсан. Би хохирсон юм болов уу гээд таван удаа уулзсан. Өөрөө 2-3 жилийн өмнө мах экспортлох гэж байгаад хохирсон гэж ярьдаг. Хохирлынхоо хэмжээг хэлдэггүй. Ажлын алба гаргаад шалгахаар нэр дээр нь мах, компани, агуулах байдаггүй. Хохирсон бол шүүхэд өг. Шүүхээр биш бол нөхөн төлбөр гаргах боломжгүй гэдгийг нь хэлсэн. Гэхдээ шүүхэд өгдөггүй. Яамны зүгээс тэр эмэгтэйг хохироосон зүйл байхгүй юм билээ” гэв.