Өнөөдрөөс ОХУ-аас нийлүүлдэг байсан 345 МВт цахилгаан эрчим хүчийг 150 МВт болгон тодорхойгүй хугацаагаар хязгаарлахаа мэдэгдсэн. Тиймээс манай улс тодорхойгүй хугацаагаар цахилгаан хязгаарлахаар болсон. Тодруулбал, төвийн зургаан аймаг, 150 сум, Улаанбаатар хотын цахилгааныг хязгаарлана гэдгийг Эрчим хүчний сайд Б.Чойжилсүрэн мэдээлсэн. Эрчим хүч хязгаарлахад хэрхэн бэлдэж байгаа талаар Дархан-Уул аймгийн “Дархан Сэлэнгэ цахилгаан түгээх сүлжээ” ХК-ийн мэргэжилтэн Ц.Бат-Уулаас тодрууллаа. Тэрбээр “Дархан-Уул аймгийн Орхон сумын хэмжээнд шаардлагатай байгууллагуудад цахилгааны нөөцтэй байхыг анхааруулсан. Мөн түлээ, түлш бэлдэхийг анхааруулсан. Одоогийн байдлаар цахилгаан хязгаарлагдаагүй байгаа учир бид бэлэн байдал ханган ажиллаж байна. Цахилгаан хэдий хугацаанд хягзаарлах эсэхийг Эрчим хүчний яам болон Эрчим хүч зохицуулах хорооноос урьдчилан мэдэгдэх байх. Манай улс цахилгааныг хязгаарлаж зохицуулахаас өөр аргагүй байгаа” гэв.