Эрүүгийн цагдаагийн албаны Хүнд гэмт хэрэгтэй тэмцэх хэлтсийн алба хаагчид 18 жилийн өмнө үйлдсэн онц ноцтой хоёр хэргийг нөхөн илрүүлжээ. Тодруулбал, нийслэлийн Баянгол дүүргийн 11 дүгээр хорооны үерийн далан дотроос 2005 оны арванхоёрдугаар сарын 17-нд иргэн Б-ийн цогцсыг олсон. Мөн тус дүүргийн 11 дүгээр хорооны жалганаас 2006 оны арваннэгдүгээр сарын 21-нд иргэн О-г хүчиндэж, хөнөөсөн байсныг илрүүлсэн байдаг. Тэгвэл дээрх хоёр хэргийг удаа дараа ял шийтгүүлж байсан Э гэгч үйлдсэн болохыг 18 жилийн дараа нөхөн илрүүлж, мөрдөн шалгах ажиллагаа явуулж байгаа юм байна.