Засгийн газрын чуулганы хуралдаан үргэлжилж байна. Энэ үеэр Эрчим хүчний сайд Б.Чойжилсүрэн мэдээлэл өглөө. Тэрбээр “Өнөөдрөөс ОХУ-аас нийлүүлдэг байсан 345 МВт цахилгаан эрчим хүчийг 150 МВт болгон тодорхойгүй хугацаагаар хязгаарлахаа мэдэгдсэн. Тодруулбал, ОХУ-ын нэр бүхий хоёр цахилгаан станцад гэмтэл гарсан, шинээр ашиглалтад оруулах байсан 500 МВт шинэчлэл хийж байсан учир цахилгаан эрчим хүчийг хязгаарлахаас өөр аргагүй болоод байна. Төвийн зургаан аймаг, 150 сум, Улаанбаатар хотын цахилгааныг тодорхойгүй хугацаагаар хязгаарлана. Тиймээс эрчим хүчний салбар өндөржүүлсэн бэлэн байдалд орчихсон байгаа. Нэгдүгээр зэргийн хэрэглэгч буюу эмнэлэг, сургууль, онцгой байдал зэрэг нэн шаардлагатай албан байгууллагуудыг цахилгааны хязгаарлалтад оруулахгүй байх тал дээр онцгойлон анхаарч, төлөвлөгөө боловсруулж байна. Мөн хөлдөлт үүсгэхгүй байх тал дээр анхаарч байгаа" гэв.