Цахим сүлжээнд маргааш буюу арванхоёрдугаар сарын 13-нд хөрсөн дээрээ -42 хэм хүртэл хүйтрэн гэсэн мэдээлэл тавигдсан. Тус мэдээлэлтэй холбоотойгоор Цаг уур орчин шинжилгээний газрын мэргэжилтнээс тодрууллаа.

       Тэрбээр “Ойрын өдрүүдэд ихэнх нутгаар хүйтний эрч чангарч байгаа. Цаг агаарын урьдчилсан мэдээгээр энэ сарын 15-18-ны өдрүүдэд цаг агаар эрс хүйтэрч яармаг, их сонгинын орчимд шөнөдөө 40-42  хүрч хүйтэрнэ. Улаанбаатар хотын  төв хэсгээр өдөртөө 26-28 хэм, шөнөдөө 30-32 хэм хүрч хүйтрэн. Хүйтний эрч арванхоёрдугаар сарын 20-н хүртэл сулрахгүй гэсэн мэдээлэлтэй байна” гэв.

2023 оны арванхоёрдугаар сарын 13-17-ныг  хүртэлх цаг агаарын урьдчилсан төлөв:

    13-нд баруун болон төвийн аймгуудын ихэнх нутаг, говь болон зүүн аймгуудын нутгийн хойд хэсгээр, 14-нд баруун аймгуудын нутгийн зүүн хэсэг, төв, говь, зүүн  аймгуудын ихэнх нутгаар, 15-нд нутгийн зүүн хагаст, 16-нд Хангай, Хөвсгөл, Хэнтийн уулархаг нутаг болон Халх голын сав газраар цас орж, цасан шуурга шуурна. Салхи ихэнх нутгаар секундэд 5-10 метр, 13-нд нутгийн зарим газраар, 14-нд говь, тал, хээрийн нутгаар, 15-нд говь, талын нутгаар зарим үед секундэд 13-15 метр хүрч ширүүснэ. Хөвсгөлийн уулархаг нутаг, Завхан голын эх, Идэр, Тэс голын хөндийгөөр шөнөдөө -37...-42 градус, өдөртөө -27...-32 градус, Хангай, Хэнтийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө -30...-35 градус, өдөртөө -20...-25 градус, говийн бүс нутгийн баруун өмнөд хэсгээр шөнөдөө -12...-17 градус, өдөртөө -3...-8 градус, Их нууруудын хотгор, Хангайн нурууны өвөр бэлээр шөнөдөө -19...-24 градус, өдөртөө -9...-14 градус, бусад нутгаар шөнөдөө -24...-29 градус, өдөртөө -16...-21 градус хүйтэн байна. Хугацааны сүүлчээр хүйтний эрч нэмж чангарна.