Зариг.мн сайтын эрхлэгч Н.Өнөрцэцэгийг цагдан хорьсонтой холбоотойгоор мэдээлэл өглөө.

        Зариг.мн сайтын сэтгүүлч Ш.Адьяамаа “Зариг.мн сайтын үйл ажиллагаа хэвийн явж байгаа гэдгийг хэлье. Өнөөдөр Н.Өнөрцэцэг гэх ганцхан сэтгүүлчид биш, Монголын сэтгүүл зүй, хэвлэн нийтлэх эрх чөлөөнд аюултай дохио ирж байгаа гэдгийг бид харж байна. Процесс алдагдсан гэдгийг өмгөөлөгчдийн зүгээс хэлж байна. Учир нь, цагдан хорих шийдвэр гаргах ёсгүй байж, үүний өмнө албадан авчрах ийм шийдвэр гараад тодорхой мэдүүлэг, бусад зүйлийг тодруулах үйл ажиллагаа явагдах байж. Манай эрхлэгч Н.Өнөрцэцэг нийгэмд олон асуудлын дуу хоолой болж, түүний хөндсөн асуудал нь өөрөө нийгэмд шүгэл үлээгч болж, хөндсөн асуудалд нь олон нийт анхаарал хандуулж, тэр хэрээр авлига, албан тушаалын гэмт хэрэгтнүүд, өндөр албан тушаал хашиж байгаа хүмүүсийн эрх ашгийг хөндөж ирсэн байна гэдгийг өнөөдөр бүгд харж байгаа байх. Сэтгүүлч дөрөв дэх засаглалынхаа үүргийн хүрээнд олон нийтийн эрх ашиг хаана зөрчигдөж байна, тэр асуудлыг хөндөн сурвалжлах нь Монгол Улсын сэтгүүл зүйд хаагдсан гэж байна. Өөрөөр хэлбэл, албан тушаалтны мэдээллийг зүгээр нэг дамжуулдаг байдлаар ажиллах чинь сэтгүүлчийн ажил биш шүү дээ. Харин асуудал хаана байна, ард иргэдийн өмнө тулгамдаж байгаа мэдээ мэдээллийг гаргаж, улмаар шийдүүлэх нь сэтгүүлчийн үүрэг бөгөөд сэтгүүлчийн гол хийдэг ажил юм. Яг ингэж ажилласныхаа төлөө өнөөдөр Зариг.мн сайтын Н.Өнөрцэцэг эрхлэгчийг цагдан хорих нөхцөл үүслээ. Цаашид бид болж буйгаа үйл явцыг олон нийтэд нээлттэй ил тод хүргэнэ" гэв.