Яармагийн 300 ортой эмнэлэг буюу Эх, нярай хүүхдийн үндэсний хоёрдугаар төвд  хэвтэн эмчлүүлж буй 0-2 насны 17 хүүхдэд сувилагч цагийн тариаг нь андуурч хийснээс зарим хүүхэд  таталт өгч, биеийн байдал нь муудсан талаар бид өмнө нь мэдээлсэн. Энэ талаар хэвтэн эмчлүүлж байсан хүүхдүүдийн ар гэрийнхэн хэвлэлд мэдээлэл өглөө.

Тэрбээр “Манай охин уушгины хатгалгаа гэсэн оноштойгоор эмнэлэгт хэвтсэн.  Ханиад нь овоо дажгүй болж байсан чинь өчигдөр гэнэт бие нь муудсан. Эцэг эхчүүдийг  "Та нар тайван байгаач. Яагаад сандарч тэвдээд байгаа юм бэ" гэсэн. Нярайн эмч нар орж ирээд өөр тасаг руу аваад явсан. Хүүхдүүд бүгдээрээ ухаангүй байсан. Тэгээд  хүчилтөрөгчийн аппарат залгаж, шингэн дусал хийсэн. Би өөрөө жирэмсэн хүн болохоор тэвдээд, ухаан алдах гээд байсан. Сувилагч өчигдөр орой 23:00 цагийн үед тариа хийсэн. Тариагаа хийхдээ манай өрөөнд орж ирээд, дэргэд найруулсан. Бид "Энэ тариа яагаад шар өнгөтэй байгаа юм бэ" гэж асуусан чинь "Бидэнд ийм л тариа байна" гэсэн. Тариа хийж дуусаад сувилагч  нар гараад цаг болоогүй байхад хүүхдүүдийн бие муудсан. Өрөөнд байсан найман хүүхэд бүгд реакци өгсөн. Эмч сувилагч нь бидэнд ийм тариа тарих гэж байна гэж танилцуулаагүй. Харин "Бид хоёр жирэмсэн эх төрүүлээд нойргүй хоносон. Эртхэн амармаар байна. Яараад байна" гэж ярьсан. Өмнөх өдрүүдэд хүүхдүүдэд цагаан өнгөтэй тариа тарьж байсан. Тэгсэн өчигдөр оройн тариа шар өнгөтэй байсан. Өглөөнөөс л хүүхдүүдийн биеийн байдал нь тогтворжиж байна. Хүүхдүүдэд тариа хийхгүй байгаа. Охин маань ухаан орсон. Хоол унд идэхгүй, толгой өвдөөд байна гээд зовуурьтай  байна” гэв.