Яармагийн 300 ортой эмнэлэг буюу Эх, нярай хүүхдийн үндэсний хоёрдугаар төвд  хэвтэн эмчлүүлж буй 0-2 насны 17 хүүхдэд сувилагч цагийн тариаг нь андуурч хийснээс зарим хүүхэд  таталт өгч, биеийн байдал нь муудсан талаар бид өмнө нь мэдээлсэн. Энэ талаар тус эмнэлгийн эмч, холбогдох ажилтнууд мэдээлэл өгч байна.

           Эх, нярай хүүхдийн үндэсний хоёрдугаар төвийн дэд захирал “Бид шөнөжин ажилласан. Ямар нэгэн байдлаар тарианы процедурын алдаа гарсан байх магадлалтай гэж үзэж байна. Тариа хийх Монгол Улсын стандарт бий. Стандарт зөрчигдсөн учраас 17 хүүхдэд урвал өгсөн гэж үзэж байна. Нийт 21 хүүхдэд тариа хийсэн. 21 дэх хүүхдийн тариаг хийж байхад эхний хүүхдэд шинж тэмдэг илэрсэн юм билээ. Үйлчлүүлэгчид тариа болон хугацааг нь харуулах ёстой. Өнөөдрийн байдлаар 121 сувилагч ажиллаж байгаа” гэв.