Хууль зүйн сайд асан Х.Тэмүүжинээс Эрүүгийн хуулийн зарим зүйл заалтын талаар тодруулж байна.

Тэрбээр “Хүн гэдэг зүйл заалт дээр эрх баригчдад “хүн” гэдэгт сэтгүүлч орохгүй гэж тайлбарлаж байсан, тийм биш. 2002 оны Эрүүгийн хуульд “иргэн” гэж үг байсан юм. Энэ дээр иргэний харьяалалгүй хүн гэмт хэрэг хийсэн бол Эрүүгийн хууль үйлчлэх үү гэдэг маргаан гарсан. Ингээд илүү өргөн ойлголтой болгох зорилгоор хүн гэж бичсэн. Хүн гэдэг мэргэжил, харь улсын иргэн гэдгээр хязгаарлагдахгүй. Мөрдөн шалгах ажиллагааны нууц задалсан гэх энэ гэмт хэрэгтэй холбогдуулаад 2015 оны Эрүүгийн хуульд  хоёр үндсэн агуулга байсан юм. Мөрдөн шалгах ажиллагааны нууцыг мэдэх эрх бүхий этгээдүүд  буюу мөрдөн байцаагч,прокурор, хэлмэрч, өмгөөлөгч задалсан бол гэдэг байдлаар задалж өгсөн байсан. Мөн нууц гэж юуг хэлэх вэ гэдэг дээр хязгаарлалтай байсан. Мөрдөн шалгах ажиллагаа гээд хавтаст хэрэгт орсон бүхнийг нууцлахгүй. Учир нь , иргэн өөрийгөө хамгаалах, урьдчилан сэргийлэх ёстой. Нууц гэдэгт нууцлагдсан гэрч, мөрдөн шалгах ажиллагааны тактик, гүйцэтгэх ажиллагаа, тагнах турших ажиллагаа нууц байх, мөн ноцтой гэмт хэргийг шалгаж байхад мөрдөн шалгах байгууллагат нууцлах зүйлс гарч болно зэрэг байсан. Одоо бол юу нууцлах гэдэг нь тодорхойгүй, бүхнийг нууцлах гээд байна. Хүн гэдэг ойлголтыг хэрэглэчихээр бүх хүнийг шийтгэж болох юм байна гэсэн дүр зураг харагдаж байна. Шүүх мэдээж хуулийг хэрэглэнэ. Сэтгүүлчийг хүн биш гэж хэн ч хэлэхгүй. Магадгүй мөрдөн шалгах үйл ажиллагаанд  авлига өгсөн, танил талдаа үйлчилдэг, ашиг сонирхлын зөрчилтэй байж болно.  Тодорхой гэмт хэргийг илрүүлэхгүй байх сонирхолтой бүлэг байж болно. Энэ тохиолд хүссэн хүсээгүй мөрдөн шалгах ажиллагааны нууцыг олон нийтэд задлах хэрэгцээ гарч магадгүй. Гэтэл энэ нь мөрдөн шалгах ажиллагааны нууцыг задалж байна. Хүн гэдэгт сэтгүүлч багтана гээд хэвлэлийн эрх чөлөөнд халдах аюултай. Мөрдөн шалгах ажиллагаанд оролцож байхдаа эрхээ баталгаатай хамгаалах боломжтой юу. Эрүү шүүлтэд өртөж байвал яах вэ. Эрүү шүүлтэд өртөж байгаагаа олон нийтэд дэлгэвэл мөн адил мөрдөн шалгах ажиллагааны нууц задалсан гэдэгт багтах уу гээд олон асуудал гарна. Энэ хуульд зөв зохистой ухаалга зохицуулалт хийе гэвэл хоёр зүйлийг зарлах ёстой. Нууц гэж тооцох мэдээ баримт болон үйлдлийн аль хэсгийг нь хамааруулах хүрээ хязгаарыг маш тодорхой заах ёстой. Мөн энэ төрлийн гэмт хэрэг хэнд үйлчлэх вэ, хэн задалсныг гэм хэрэг гэж үзэх вэ гэдгийг тодорхой зааж өгөх хэрэгтэй. Хэтэрхий өргөн байгаа зүйл шударга систем ажиллахад саад болно.