Өмгөөлөгч Б.Билгүүн: 40 жилийн өмнөх хэрэг дээр нөхөн төлбөр авах боломжтой болсон

2023-11-21, 1587

Зэвсэгт хүчний алба хаагч амиа алдсан асуудалтай холбоотой Зариг.мн мэдээллийн сайтаас "Дахиад өгөх амь алга, одоо зогсоо" хэлэлцүүлгийг зохион байгуулж байна. Энэ үеэр цэрэгт яваад хохирсон алба хаагч болон ар гэрийнхэн байр сууриа илэрхийлж байна. Энэ үеэр хохирогчийн өмгөөлөгч мэдээлэл өглөө.

Хохирогчийн ар гэр: Манай нөхөр 1982 онд хилийн цэрэгт алба хаахаар явсан юм. Гэтэл зургаан сарын дараа "Тархиндаа буудуулсан. Дохионы буугаар буудаад, тархи нь шатчихсан" гэсэн мэдээ ирсэн. Одоо бол амьд. 18 настайдаа цэрэгт явсан хүн өдийг хүртэл өвчинтэйгөө тэмцэж байна. Тухайн үед нь манай хүнийг ээжид нь "Танай хүүхэд өөрийгөө хоролчихсон" гэж хэлсэн байдаг. Энэ хэрэг дарагдаж яваад хэдэн жилийн дараа манай нөхөр өөрийгөө буудаагүй гэдгийг нь хэлсэн юм билээ. Үүнээс хойш бид хуулийн байгууллагаар явж тухайн үеийн хилийн цэргийн байгууллагын алдаа байсан гэдэг нь тогтоогдсон. Мөн хөөн хэлэлцэх хугацаа дууссан гэдэг хэргийг сургуулиа төгсөөд удаагүй Б.Билгүүн гэдэг өмгөөлөгч өмгөөлж, бид шүүх дээр ялалт байгуулсан.

Өмгөөлөгч Б.Билгүүн: Хөөн хэлэлцэх хугацаа дуусаад хаагдсан ч одоо бүх хэрэг дээр хохирогчдын ар гэрийнхэн сэтгэл санааны нөхөн олговор авах боломжтой болсон шүү. Сэтгэл санааны үнэлгээ тогтоодог болсон. Би гурван жилийн өмнөөс энэ хэрэг дээр ажиллаж эхэлсэн. Одоогоос 40 жилийн өмнө энэ хэрэг болсон. Гэхдээ хохирогчийн ар гэрийнхэн энэ хэргийг хэзээ ч орхиогүй. Эцэс төгсгөлгүй явж байгаад 2019 оноос хойш шүүхээр орж, 2022 онд гурван шатны гүүхийн шийдвэр гарсан. Улмаар Улсын дээд шүүхээр эцэслэхдээ "Иргэн н.Эрдэнэбат нь толгойдоо буудуулж, хөдөлмөрийн чадвараа 90 хувь алдсан. Иймд Хил хамгаалах ерөнхий газрыг буруутайд тооцож, 288 сая төгрөгийг гаргуулан авах нь зүйтэй" гэсэн шүүхийн шийдвэр гарсан. Тиймээс энд суугаа иргэдийг өмгөөлөгч, хуулийн байгууллагад хандвал хохирлоо барагдуулж болдог. Үр дүн гардаг шүү гэдгийг сануулах гэсэн юм.

40 жилийн өмнө гарсан хэрэг дээр хөөн хэлэлцэх хугацаа нь дууссан гэсэн ч эцэст нь шүүхийн шийдвэр хохирогчийн талд гарсан. Гэтэл шүүхийн шийдвэр гараад нэг жил болсон ч шүүхийн шийдвэрийг гүйцэтгэхгүй байна. Хил хамгаалах ерөнхий газар болон ЗХЖШ-т хохирол барагдуулах сан гэж огт байдаггүй. Хууль зүй дотоод хэргийн яамны дэргэд Гэмт хэргийн улмаас хохирсон бол нөхөн олговор олгох сан гэж байдаг. Энд жилд хоёр тэрбум төгрөг төсөвлөдөг. Энэ жил 1.8 тэрбум төгрөг байна. Гэтэл цаана нь нөхөн төлбөрөө авах 207 хүн байна. Нийт нөхөн төлбөр нь 70 тэрбум төгрөг болж байгаа юм. Ингээд шүүхийн шийдвэр бүхий хоосон цаастай л үлдэж байгаа. Үүнийг хууль тогтоох дээд байгууллага болон ЗХЖШ-ын байгууллагынхан анхаармаар байна. Хохирсон иргэдийн хохирлыг барагдуулах сангийн мөнгийг нэмж өгмөөр байна. Ийм асуудал цаашид гарахгүй байх үндэс нь хууль тогтоомжуудыг хэрэгжүүлж, алба хаагч нартаа таниулан суртчлах ажил дутмаг байна.

Өмгөөлөгч Б.Билгүүн: 40 жилийн өмнөх хэрэг дээр нөхөн төлбөр авах боломжтой болсон

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.