Спорт бооцооны зах зээлийн талаар судлаач Б.Батболдоос тодрууллаа

       Тэрбээр “Спорт бооцооны зах зээлийг олон жил анхааралтай ажиглаж байна.Бооцооны салбартай холбоотой бүх асуудал, бэрхшээл нь зохицуулалт муутай зах зээлээс шалтгаалсан байдаг. Зохицуулалт муугаас тухайн салбарын талаарх мэдээлэл тун хомс байгаа нь ажиглагддаг. Маш олон насанд хүрээгүй хүүхдүүд бооцоо тавихын хор уршгийн талаар мэдээлэлгүйн улмаас хамааралд орж, донтдог.

  Ийм учраас л төрөөс бооцооны зах зээлийн бүх тоглогчдод  ижил нөхцөлд үйл ажиллагаа явуулах боломж олгох, шаардлагатай хууль дүрмүүдийг батлах хэрэгтэй. Хуулиар зохицуулснаар иргэд залилангаас хамгаалагдаж, эмээх зүйлгүй тоглож чадна. Мөн улс татвараас орлого олж, тамирчид, багууд ивээн тэтгэгчдийн дэмжлэг авч, улам хөгжиж чадах юм.

      Өнөөдрийн байдлаар манайд спортын бооцоог зохицуулах тусгай хууль журам байхгүй. Зөвхөн Зөвшөөрлийн тухай хуулиар л зохицуулагдаж байна. Энэ хууль 2022 оны зургадугаар сарын 17-нд батлагдсан ч өргөдөл гаргах журам, хяналтын эрх мэдэл, үйл ажиллагааны зөвшөөрлийн хүчинтэй байх хугацаа гэх мэт чухал зүйлс дурдагдаагүй.

     Энэ алдааг арилгахын тулд өнгөрсөн жил Бооцоот таавар, хонжворт сугалааны тухай тусгай хуулийн төслийг боловсруулсан юм. Энэ хууль спорт бооцоотой холбоотой бүх асуудлыг шийдвэрлэж, зохицуулах ёстой байлаа. Даанч бараг бүтэн жил өнгөрөөд байхад хууль батлагдаагүй хэвээр байна.

     Хэд хэдэн гадаадын компани Зөвшөөрлийн тухай хуулийн дагуу зөвшөөрөл авах гэж оролдсон боловч холбогдох албаны хүмүүс тусгай зохицуулалт байхгүй гэдэг үндэслэлээр эрх олгоогүй. Гэтэл дотоодын нэр бүхий компани 2022 оны есдүгээр сарын 26-нд бооцооны үйл ажиллагаа явуулах албан ёсны зөвшөөрөл авсан гэх  мэдээлэл гарсан байна лээ.

      Монголд албан ёсны зөвшөөрөл авч, спорт бооцооны үйлчилгээ үзүүлэх хууль ёсны, ил тод арга байхгүй байгаа гэдэг нь бодит үнэн. Зохицуулах хууль, дүрэм байхгүй нь бооцооны салбарын зах зээлд эрх мэдлээ урвуулан ашиглах, авлига гарах гарцаагүй байдлыг үүсгэх бөгөөд үүнийг бид хэд хэдэн компанийн жишээн дээр ажиглаж болно.

   Энэ зах зээлд олон төрлийн брэнд үйлчилгээ үзүүлж байвал ганцхан компани байснаас илүү улсын төсөв, санхүүд хэрэгтэй. Мөн спортын холбоод нэмэлт дэмжлэг авч, материал, техникийн баазаа шинэчилж чадах байлаа. Ингэснээр олон улсын тэмцээн уралдаанд үзүүлэх Монгол Улсын шигшээ багийн амжилт ч эрс өсөх байлаа” гэлээ.