“Хэнтий, Хангай, Соёны өндөр сайхан нуруунууд

Хойд зүгийн чимэг болсон ой хөвч уулнууд

Мэнэн, Шарга, Номины өргөн их говиуд

Өмнө зүгийн манлай болсон элсэн манхан далайнууд

Энэ бол миний төрсөн нутаг

Монголын сайхан орон” хэмээх шүлгийг мэддэггүй монгол хүн үгүй биз ээ. Тэгвэл өнөөдөр энэхүү шүлгийг туурвисан нэрт зохиолч Д.Нацагдоржийн төрсөн өдөр тохиож байна.

      Д.Нацагдорж  1906 оны арваннэгдүгээр сарын 17-ны өдөр Түшээт хан аймгийн Дархан чин вангийн хошуу, эдүгээгийн Төв аймгийн Баяндэлгэр сумын нутаг Гүн Галуутай гэдэг газар төржээ. Түүнийг Монголын орчин үеийн уран зохиолыг үндэслэгч зохиолч, яруу найрагч гэдэг.

     Тэрбээр бага насандаа бичиг үсэг сурч 1921 онд Ардын хувьсгал ялсны дараа нийгэм улс төрийн ажилд идэвхтэй оролцож, хувьсгалт шинэ соёл урлагийн ажилд чармайн зүтгэжээ. 1924 онд 18 настай Нацагдорж Улсын Анхдугаар Их Хурлын зохион байгуулалтын ажилд оролцож байжээ. Д.Нацагдорж нь ЗХУ болон Германд хэдэн жил суралцаж, өрнөдийн соёлын шилдэг өв сантай гүнзгий танилцжээ.

     Тэрбээр Монгол хүн бүрийн мэдэх "Ушаандар", "Сандо амбаны харгис явдал" жүжиг, "Учиртай гурван толгой" дуурь, “Түүхийн шүлэг”, "Миний нутаг", "Од", "Октябрь" зэрэг олон арван шүлэг, "Хуучин хүү", "Цагаан сар ба хар нулимс", "Харанхуй хад" зэрэг зохиол, өгүүллэгүүдийг туурвисан билээ.

        Д.Нацагдорж бол Монголын утга зохиолын анхны орчуулагчдын нэг. Тэрбээр ОХУ болон  дэлхийн сонгомол зохиолуудтай монгол уншигчдыг анх танилцуулж А.С.Пушкиний "Гилбэрийн хатан", "Буудалцсан нь", Эдгар Погийн "Алтан цох" гэх мэт хэдэн зохиолуудыг орос, герман хэлнээс орчуулж байсан юм.