Сансарын “Баясах” супермаркетын үүдэнд бохир хальж, зам дээр урссан бичлэг олон нийтийн сүлжээгээр цацагдсан. Бохирын шугам юунаас болж бөглөрсөн талаар Нийслэлийн Захирагчийн албаны Хотын инженерийн байгууламжийн хэлтсийн дарга М.Балдандоржоос тодрууллаа.

    Тэрбээр “Зүүн дөрвөн замаас Халдварт руу уруудах зам дагуу бохирын шугамд хонины нэхий хийсэн байсан учир бөглөрч, бохир хальсан асуудал гарсан. Дуудлагын дагуу Ус сувгийн удирдах газрынхан бохирын хоолойг цэвэрлэж, орчныг ариутгаж байна. Иргэд, аж ахуйн нэгжийнхэн бохирын хоолой болон худаг руу төрөл бүрийн хог хийдэг. Бохирын хоолойноос үхрийн толгой, гал тогооны алчуур, хувцас, цогцос хүртэл гарч ирдэг. Үүнийг холбогдох газрын хүмүүс гараараа цэвэрлэдэг. Тиймээс иргэд бохирын хоолой руу төрөл бүрийн хог хаягдал хийхгүй байхыг анхааруулж байна” гэлээ.