Зэвсэгт хүчний 326 дугаар ангид цэргийн алба хааж байсан 21 настай залуу харамсалтайгаар амиа алдсан хэрэг гарсан билээ. Тус хэрэгтэй холбоогдуулан 326 дугаар ангийн алба хаагчдыг ар гэрийн хяналт дор дахин цэргийн үзлэгт хамруулж байгаа юм. Эх сурвалжууд цэргүүдийн олонх нь ханиадтай байгаа талаар мэдээлж байна. Эцэг, эхчүүдийн сэтгэгдлийг хүргэж байна.

Эцэг, эх: "Талийгаачийн ар гэрийнхэнд гүн эмгэнэл илэрхийлье. Залуус энх цагт цэрэгт яваад эргэж ирэхгүй байгаа нь харамсалтай байна. Үүнээс гадна дахин цэргийн үзлэгт хамруулж байгааг үнэхээр гайхаж байна. Уг нь анх цэрэгт татахдаа үзлэгээ бүрэн дүүрэн хийгээд ёс журмын дагуу татах ёстой биз дээ. Гэтэл орон тоо гүйцээх гэж цэргийн үзлэг хальт хийсэн болоод залуусыг цэрэгт хүчээр татаж байна. Манай хүү цэрэгт явах бодолгүй байсан. Сургуулийн тодорхойлолтоо үзүүлсэн хэдий ч үл тоомсорлон хүчээр цэрэгт татсан. Үнэндээ их санаа зовж, тайван суух арга алга.

Эцэг, эх: Дөнгөж 21 настай хүү тэнгэрийн оронд одож, нэгэн ээж шаналалд уналаа. Тун харамсалтай хэрэг гарлаа. Цэрэгт мордсон залуус төлөвшөөд ирэх атал цогцос болоод ирж буй нь айдас төрүүлж байна. Хүүгийнхээ биед ямар нэг гэмтэл байгааг шалгахаар энд ирсэн. Одоогоор уулзаж чадаагүй л байна. Цэргийн тангараг өргөхөөс нь өмнө хүүгээ татаад авах эрх зүйн ямар арга байгааг судалж байгаа. Хүүгээ цэргээс нь татаж аваад сургуульд нь сургамаар байна. Хэрвээ хүүгээ цэргээс татаж авч чадахгүй бол өндрөөс бүтэн нойртой хонож чадахгүй байх. Хүү минь цэрэгт өөрийн хүслээр яваагүй. Үзлэг дууссаны дараа шууд л үсийг нь хусаад хүчээр авч явсан байна лээ" гэв.