"Юнител" компани хэрэглэгчийн мэдээллийн нууцлалыг задруулж,  хохироосон гэх  асуудлаар иргэн Н.Мэндбилэг мэдээлэл хийж байна. Түүний цахим хаягт байсан Ерөнхийлөгчийн талаарх хошигносон дүрс бичлэг устгагджээ.

          Тэрбээр “Миний утасны дугаар надад байхад өөр газраас миний дугаарыг ашиглан цахим хаягт нэвтэрч миний майл хаягийг сольсон. Есдүгээр сард юнител компанид өргөдөл гаргасан. “Юнител” компани хариуд нь “Биднээс шалтгаалаагүй. Та өөрөө бараг сольсон байна” гэсэн. Энэ бол хувь хүний эрхэнд ноцтойгоор халдсан үйлдэл. Мөн миний асуудлын талаарх сайтуудаар гарсан мэдээллүүд устаж эхэлсэн. Миний цахим хаягт байсан олонд хүрсэн мэдээллүүд устсан. Хамгийн их эргэлзэж байгаа шалтгаан нь “Юнител” компани надад өгсөн хариундаа “Та энэ хариултад эргэлзсэн тохиолдолд төрийн болон бусад хяналтын байгууллагуудаар шалгуулах эрх нээлттэй бөгөөд бодит байдлыг буруугаар ойлгож, үндэслэлгүйгээр байгууллагын нэр хүн хүндэд халдаж, бусдад болон хэвлэл мэдээллийн хэрэгслээр худал, ташаа мэдээлэл түгээвэл хариуцлага тооцно” гэж хэлсэн. “Юнител” компани арван орчим сайтад байсан мэдээллийг маань устгуулсан юм шиг санагдаж байгаа. Ер нь үүрэн холбооны компаниудаас болж хохирсон иргэн олон байна. Надтай холбогдож, тусална, дэмжинэ гэсэн хүмүүс байгаа. Иргэд бүүр айдастай болсон байна. Ерөнхийлөгчийн талаар мэдээлэл хийсний дараа нууцалсан дугаараас “Аятайхан байгаарай” гэсэн утгатай дуудлага олон ирсэн. Би аюулгүй байх баталгаатай болмоор байна.  Хүний төлөө ажиллаж чадаж байгаа учраас АН-ын хүний эрхийн хороонд өргөдөл, хүсэлт гаргана. Би үүрэн холбоо болон цахим орчин дахь хүний эрхийг хамгаалах холбоо байгуулж ажиллана” гэв.