Цасан шуурганы улмаас малчид төөрч, сураггүй болох, хөлдөж амиа алдах тохиодол нэмэгдсэн. Үүнтэй холбоотойгоор Гэмтэл, согог судлалын үндэсний төвд хэвтэн эмчлүүлж,тусламж, үйлчилгээ авч байгаа иргэд нэмэгдсэн гэх мэдээлэл бий. Энэ талаар ГССҮТ-ийн Хэвлэл мэдээлэл хариуцсан мэргэжилтнээс тодрууллаа. Тэрбээр “Энэ сарын 3-5-ны өдөр ууланд авирсан хоёр хүний хөл, гар хөлдсөн байдалтай ГССҮТ-д ирж, эмнэлгийн тусламж үйлчилгээ авсан. Үүнээс гадна цас орсны улмаас сүүлийн гурав хоногт 146 хүн халтирч, гулгаж унасан байна. Тэдний 121 нь төв эмнэлэгт хандсан бол үлдсэн 25 нь дүргүүдэд байрлах салбар эмнэлэгт хандаж, тусламж үйлчилгээ авсан байна. Халтирч унасан хүмүүсийн аарцаг задрах, тархиараа савж унах, шилбэ, гарын шуу, нуруу хугардаг. Халтирч унасан хүмүүсийн яс 6-12 сарын хугацаанд эдгэрдэг учир иргэдийг анхаарал болгоомжтой байхыг ГССҮТ-өөс анхааруулж байна. Мөн бэртэж, гэмтсэн иргэд заавал төв эмнэлэгт ирэх шаардлагагүй. Дүүргийн салбар эмнэлэгт хандаж, яаралтай эмнэлгийн тусламж үйлчилгээ авах хэрэгтэй” гэсэн юм.