Засгийн газрын хуралдаанаас гаргасан шийдвэрийг танилцуулж байна. Энэ үеэр Сангийн сайд Б.Жавхлан мэдээлэл өглөө.

Тэрбээр “Хоёр сайн мэдээ дуулгая. Нэгдүгээрт, Хөгжлийн банк 500 сая ам.долларын бондын өрөө 100 хувь барагдууллаа. Өрийг өрөөр төлсөн гэх мэт дахин санхүүжилт байхгүй. Монгол Улсын Хөгжлийн банк Нийт 67 зээлдэгчийн зээлээс 40 зээлдэгчийн 1,8 их наяд төгрөг чанаргүй зээл хэмээн үнэлэгдэж, цаашид хэвийн үйл ажиллагаа үргэлжлүүлэх нь бүү хэл энэ банкны байлгах эсэх нь эргэлзээтэй байсан. 2022 нэгдүгээр сарын 20-ны өдрийн байдлаар ийм байсан. Өнгөрсөн хугацаанд Засгийн газар, Сангийн яамнаас тус банкны үйл ажиллагааг зөвхөн чанаргүй зээлийн эргэн төлөлтийг  хангуулахад бүрэн чиглүүлж, шинээр нэг ч зээл олгоогүй. Ингээд 2023 оны аравдугаар сарын байдлаар 1,5 их наяд төгрөгийн зээл төлүүлсэн.

Аль Засгийн газрын үед хэн Монгол Улсын өрөнд оруулаад, хэн төлж байгааг хараарай.

• 2014 онд татсан БНХАУ-ын Хөгжлийн банкны зээлийн үлдэгдэл 135 сая ам.доллар,
• 2014 татсан “Кредит Свисс” банкны хамтарсан зээлийн үлдэгдэл 205 сая ам.доллар,
• 2016 онд татсан АНУ-ын Санхүүгийн байгууллагын зээлийн үлдэгдэл 56,3 сая ам.доллар,
• Бусад богино хугацаат эх үүсвэрийн үлдэгдэл 103 сая ам.доллар,

      Гадаад зээл төлбөрөө төлж барагдуулах нь нэг талаас олон улсын хөрөнгө оруулагчдын итгэлийг дээшлүүлэх, улмаар зээлжих зэрэглэлээ хэвээр авч үлдэх эерэг нөлөөтэй. Нэгдсэн бодлого хэрэгжүүлсний үр дүн харагдаж байгаа юм.  Энэ удаад Хөгжлийн банкны 500 сая ам.долларын бонд төлсөн нь цаашид тус банк хэвийн үйл ажиллагаа явуулах нөхцөл бололцоо боллоо. Өнгөрсөн баасан гарагт УИХ-ын гишүүн Б.Баттөмөр Ерөнхий сайдад хандаж Ирээдүйн өв сангийн талаар хэлэлцүүлэг болсон. Үүнээс хойш бид нөхцөл байдлыг дахин судалж үзсэн. Ирээдүйн өв сангийн хууль 2017 онд батлагдаж, 2019 он хүртэл нэг их наяд төгрөгийн зээл төлж барагдуулаад, 2019 оноос хойш хуримтлал бий болгосон. Нийт 2,8 их наяд төгрөгийн хуримтлалтай болжээ. 2024 онд 4,5 их наяд болохоор байна. Сангийн хөрөнгийг 2023 он хүртэл хуримтлуулах бөгөөд 2025 нэгдүгээр сарын 01-ээс тусгаарлах үүрэгтэй байгаа. 2021 онд манай Замгийн газар үйл ажиллагаагаа эхлүүлэхэд Ирээдүй өв сангийн хуримтлал 1,3 их наяд, төрийн сангийн үлдэгдэл 1,4 их наяд орчим төгрөг байсан. Тэгвэл өнөөдөр төрийн сангийн үлдэгдэл 4,3 их наяд болж гурав дахин нэмэгдэх төлөвтэй байна. Иймд сангийн хөрөнгийг тусгаарлах хугацааг наашлуулж 2024 нэгдүгээр сарын  01-ээс мөрдөхөөр шийдлээ. Одоо хууль санаачилж, Засгийн газар УИХ-д яаралтай горимоор өргөн барина.