Баянгол дүүргийн 27 дугаар хорооны нийтийн эзэмшлийн талбайд буюу хүүхдийн тоглоомын талбайд зөвшөөрөлгүйгээр хоёр эгнээ автозам тавьж, иргэдийн эрүүл аюулгүй орчинд амьдрах эрхэнд халдаж байж болзошгүй талаар тус хорооны иргэдээс гомдол гаргаад буй.

            Тодруулбал, тус хорооны 90 дугаар байрны орцноос хэдхэн алхмын зайтай “Хамаг Монгол” групп авто замын өргөтгөлийн ажлыг эхлүүлж, ашиглалтад оруулахаар зэхэж байна.

       Улмаар тус байрны хүүхдийн тоглоомын талбайг буулгаж замын ажлыг үргэлжлүүлэхээр тухайн байрны СӨХ-д хүсэлт хүргүүлээд байгаа аж. Бид энэ талаар тус байрны СӨХ-ны дарга Б.Отгонбаатар болон оршин суугч А.Алтансүхээс тодрууллаа.

      СӨХ-ны дарга Б.Отгонбаатар “Манай байрны гадна талбай нийтийн эзэмшлийн газар байх ёстой. Гэвч “Мон тед” ХХК 1996 оноос хойш тухайн газрыг эзэмшиж байгаа гэх шалтгаанаар байрны орцноос хэдхэн алхмын зайд зам тавиад эхэллээ. Харин төслийг нь “Хамаг монгол” групп гүйцэтгэж байгаа юм билээ. Энэ хоёр компаниас манай СӨХ-д газраа чөлөөлнө үү гэсэн хүсэлт өгсөн. Барилгаа барьж байх үедээ хоёр барилгын дунд хашаа барьсан байсан бол хэд хоногийн өмнө хашаагаа буулгаад, автозам тавьсан. Тиймээс оршин суугчид эсэргүүцэж, Х.Ганхуяг гишүүнд шийдэж өгөөч гэх хүсэлтийг хүргүүлсэн.

       Манай байрнаас гараад 10 метр хүрэхгүй зайд өндөр хүчдэл нь байрлаж байна. Мөн 110 айлын орон сууц тулгаж бариад, УОК-д хүлээлгэж өгөх гээд хүлээж байгаа.  Нийтийн эзэмшлийн талбайг “Мон тед” ХХК  үнэхээр хууль бусаар авсан эсэхийг Нийслэлийн стандарт хэмжил зүйн газраар шалгуулахаар хүсэлтээ өгөөд байна” гэх мэдээлэл өглөө

         БГД-ийн 27 дугаар хорооны оршин суугч А.Алтансүх “Манайх байрандаа нүүж ирээд хоёр жил гаруй болж байна. Манай байрны хойно “Хамаг монгол” групп  360 айлын орон сууц шинээр барьсан. Гэвч тус барилгын цахилгааны эх үүсвэр манай байрны хүүхдийн тоглоомын талбайн хажууд байгаад зогсохгүй орцтой нийлүүлээд автозам тавьчихлаа. Угтаа урагшаа нарны зам руу замаа тавьж болох юм. Бид хүүхдээ салхилуулах байтугай, аюулгүй орцныхоо гадаа ч салхилуулж чадахгүй болоод байна. Зарим хүн энэ барилгын эздийг НЗДТГ-ын эрх мэдэл бүхий хүмүүсийн эзэмшил гэж ярих юм билээ” гэв.