Цагдаагийн байгууллагад нийслэлийн Налайх дүүргийн нутаг дэвсгэрт 14 настай, эмэгтэй хүүхэд өчигдөр буюу аравдугаар сарын 23-ны өдрийн 20:00 цагийн үед сураггүй болсон тухай мэдээлэл бүртгэгдэж, эрэн хайх ажиллагаа эхлүүлжээ. Ажиллагааны үр дүнд 14 настай охиныг нийслэлийн Баянгол дүүргийн нутаг дэвсгэрээс өнөөдрийн 14:00 цагийн үед олж, эрэн хайх сурвалжлах ажиллагааг зогсоосон байна.

                           Ташрамд дурдахад, цагдаагийн байгууллагад 2023 оны аравдугаар сарын 1-ний өдрөөс 24-ний өдөр хүртэлх хугацаанд оршин суугаа газраасаа сураггүй алга болсон гэх 189 хүүхдийн мэдээлэл бүртгэгдсэнийг шуурхай эрэн сурвалжилж, олж тогтоон эцэг эх, асран хамгаалагчдад хүлээлгэн өгч, холбогдох байгууллагын хүүхэд хамгааллын хариу үйлчилгээнд хамруулан ажиллажээ. Үүнээс Сонгинохайрхан дүүргийн 29 дүгээр хороонд оршин суух Э гэх охиныг эрэн хайх ажиллагааг үргэлжлүүлж байгаа тул тухайн хүүхэдтэй холбоотой мэдээллийг цагдаагийн байгууллагад ирүүлэхийг холбогдох байгууллагаас зөвлөж байна.