"Ханжоу-2023” азийн 19 дэх удаагийн наадмын боксын төрөлд алтан медаль хүртсэн боксын үндэсний шигшээ багийн тамирчин Б.Чинзоригоос допинг илэрсэн талаар өмнө мэдээлсэн. Тэгвэл тамирчин Б.Чинзориг цахим хуудсаараа дамжуулан арбитрын шүүхэд хандах болсон талаараа мэдээллээ.

Тэрбээр “Би 2005 оноос хойш боксын спортоор хичээллэж байна. Энэ жил ДАШТ-ээс мөнгөн медаль авсан. Миний хамгийн том зорилго бол Парисын олимп. Энэ сард болсон Азийн наадмын үеэр миний өгсөн шинжилгээнээс допингийн зөрчил илэрсэнтэй холбоотой энэхүү бичлэгийг хийж байна. Анх тэр мэдээг сонсчихоод сэтгэл санаа хүнд, тогтворгүй байсан. Дэлхийн допингийн эсрэг төвөөс батлан гаргасан тамирчны эрхээ хамгаалах дөрөвдүгээр бүлэгт заасны дагуу уг хэргийг хянан шийдвэрлэх хүсэлт болон өмгөөлөгч авах хүсэлтээ өгсөн. Спортын арбитрын шүүхэд хандсан. Надаас болж нийт эрх нь зөрчигдсөн тамирчдаасаа уучлалт хүсэж байна. Шийдвэр гарсны дараа эргэн мэдээлэл өгөх болно” гэв.