УИХ-ын чуулган хуралдаж байна.  Хуралдаанаар Монгол Улсын нэгдсэн төсвийн 2024 оны төсвийн хүрээний мэдэгдэл, 2025-2026 оны төсвийн төсөөллийн тухай хуульд өөрчлөлт оруулах тухай хуулийн төслийг хэлэлцэж байна. Энэ үеэр Х.Ганхуяг гишүүн үг хэлж, асуулт асуулаа.

     Тэрбээр “Хуралдай бондын үлдэгдэл төлбөрийг 2024 онд  дахин санхүүжүүлнэ гэсэн. Ямар хүүтэйгээр хэрхэн санхүүжүүлэх гэж байгаа вэ. Мөн төсвийн алдагдал санхүүжүүлэхтэй холбоотойгоор 3.7 их наяд төгрөгийг дотоодын хөрөнгийн бирж дээр, дотоодын үнэт цаас гаргаж санхүүжүүлнэ гэсэн байсан. Улаанбаатар хот дотоод үнэт цаас гаргахад ойролцоогоор 17.8 хувийн хүүтэйгээр бонд босгохоор тооцоолсон байсан. Дотоод арилжааны банкнуудын чөлөөт мөнгөн урсгал хэд байгаа юм, Засгийн газар ямар хүүтэйгээр мөнгө босгох гэж байгаа юм. энэ нь хувийн хэвшилд хэрхэн нөлөөлөх юм. Мөнгөний бодлого асар хатуу орж ирнэ шүү. Энэ хэвээрээ төсөв баталбал хувийн хэвшилд хүнд тусна. Оффтэйк  гэрээтэй холбоотой мэдээлэл сонссон. 1.5 тэрбум ам.долларын нүүрс нийлүүлээд 450 сая ам.долларын алдагдал хүлээсэн гэсэн. 1.8 их наяд бараг хоёр их наяд төгрөг. Дахиад оффтэйк гэрээгээр 1.5 тэрбум ам.долларын нүүрс тээвэрлэнэ гэж байна. 32 хувийн хөнгөлөлт үзүүлж байгаа. Энийг хэзээ болих юм бэ. Мөнгө байхгүй дотоод, гадаадаас зээлнэ гээд байдаг. өөрсдийнхөө дотоод нөөц бололцоог зөв ашиглахгүй байна” гэв.