ХЗДХ-ийн сайд Б.Энхбаяр МСНЭ-ээс Эрүүгийн хуулийн  нэмэлт, өөрчлөлтийн зарим заалтыг эсэргүүцсэн шаардлагад хариу тайлбар өглөө.

Тэрбээр  “Мөрдөн шалгах ажиллагаанд оролцсон, байлцсан хүн гэдэгт хэргийн оролцогчид болон орчуулагч, хэлмэрч, шинжээч, хөндлөнгийн гэрч, иргэний нэхэмжлэгч, иргэний хариуцагч зэрэг хүнийг ойлгоно гэдэг заалт Монгол Улсын Дээд шүүхийн тайлбартайгаар хүчин төгөлдөр үйлчилж байгаа. Гэтэл сэтгүүлчдийг энэ зүйл ангиар ял шийтгэх гээд байна гэж ойлгож, олон нийтэд ташаа мэдээлэл түгээж байна. Дээд шүүхийн тайлбараар эрүүгийн хуульд заасан хүн гэдэгт тусгай субъектийг л ойлгодог. Хүн гэдэг нь хөндлөнгийн гэрч, шинжээч, тэр хэрэгт оролцсон хэлмэрч, нэхэмжлэгчийг хэлж байгаа юм.

Тухайлбал, мөрдөн байцаалтын ажил явагдаж байх үед үзлэг, нэгжлэг хийдэг. Ингэхдээ заавал хөндлөнгийн хоёроос  доошгүй гэрчийг байлгадаг.  Ингээд тухайн хоёр хүнд баримтыг үзүүлж, гарыг  үсэг зуруулж баталгаажуулдаг. Ийм хөндлөнгийн гэрчийн оролцоогүйгээр хийсэн  аливаа нэгжлэг нь  хууль бус бөгөөд шүүх дээр нотлох баримтаар тооцогддоггүй. Өнгөрсөн хугацаанд хуулийн байгууллага хэвлэл мэдээллийн хэрэгслээр дамжуулж иргэнийг тодорхой хэрэгт буруутгах, урьдчилж хэвлэл мэдээллийн хэрэгслээр зааж чиглүүлэх замаар хэлмэгдүүлдэг, эд хөрөнгийг нь булааж авдаг асуудал яригддаг байсан. Ийм асуудлыг зогсоохын төлөө ХЗДХ-ийн сайд ажиллана. Өөрөөр хэлбэл, хуулийн байгууллагынхан зарим тохиолдолд онц их хэмжээний мөнгөтэй холбоотой сүлжээ үүсгэж, ялангуяа улстөрчдийг урьдчилж хэвлэл мэдээллийн хэрэгслээр зарлаж байгаад  өрсөлдөгчөө намнадаг, бизнесийг нь дээрэмдэг явдал гарч байсан. Энэ үйлдэлтэй миний хувьд эвлэрэхгүй. Улсын дээд шүүхийн тайлбар ёсоор энэ гэмт хэргийн субъект нь жирийн иргэн, сэтгүүлчид биш. Энэ иргэд , сэтгүүлчидтэй холбоотой заалт огт биш. Энэ гэмт хэргийн субъект нь зөвхөн тусгай субъектүүд” гэв.