“Ханжоу-2023” азийн 19 дэх удаагийн наадмын боксын төрөлд алтан медаль хүртсэн боксын үндэсний шигшээ багийн тамирчин Б.Чинзоригоос допинг илэрсэн гэх мэдээлэл өчигдөр гарсан. Тодруулбал, энэ сарын 4-нд өгсөн түүний шинжилгээний дээжээс S1 бүлгийн анаболик стериод болох метандионы метаболит илэрсэн болохыг олон улсын шинжилгээний агентлагаас мэдээлсэн байдаг.

     Энэ талаар Б.Чинзориг тамирчны ээжээс зарим зүйлийг тодрууллаа. Тэрбээр “Миний хүү допингийн эсрэг үзэл бодолтой байдаг. Хүү минь допинг хэрэглэх байсан бол спортоор хичээллэхгүй байх байсан. Олон нийтийн сүлжээнд гарсан мэдээллийг хараад сэтгэл маш ихээр хямарч байна. Өчигдөр хүүгээсээ энэ талаар асуухад “Ээж ээ, та хүүдээ итгэж байгаа биз дээ. Та хүүдээ итгээрэй. Би допинг хэрэглээгүй шүү” гэсэн. Хүүгийн минь сэтгэл санаа хямарчихсан, тогтворгүй байна лээ. Хүү минь яагаад допингийн хэрэгт холбогдчихов гэдэгт маш их гайхаж байна. Орой хүүтэйгээ уулзаж, тухтай асууж, тодруулна” гэлээ.

    Тухайн тамирчнаас дээрх төрлийн бодис илэрсэн тохиолдолд түүний тэмцээнд оролцох эрхийг нь дөрвөн жилээр хасах шийтгэлтэй байдаг. Мөн Б.Чинзориг Б сорьцоо задлуулах эрхтэй аж.