Халдварт өвчин судлалын үндэсний төвийн захирлаар ажиллаж байсан Д.Нямхүүг эрх мэдэл, албан тушаалаа урвуулсан хэрэгт холбогдуулан АТГ-аас шалгаж, 2022 оны нэгдүгээр сарын 5-нд албадан саатуулсан.  Түүнд холбогдох хэргийн мөрдөн шалгах ажиллагаа дуусаж, НПГ-аас яллах дүгнэлт үйлдэн Баянзүрх дүүргийн Эрүүгийн хэргийн анхан шатны шүүхэд гэм буруутай, эсэхийг нь дэнслүүлэхээр шилжүүллээ. Прокурорын байгууллага энэ сарын 2-6-ны хооронд хэрэг бүртгэлтийн 33205, мөрдөн байцаалтын 2494 хэрэгт хяналт тавьж, 289-д нь яллах дүгнэлт үйлдэн шүүхэд шилжүүлсэн аж. Тэдгээрийн дунд авлига, албан тушаалын таван хэрэг багтжээ.

      Тэрбээр хувийн эмнэлэгт ашиглаж байсан компьютер томографыг ХӨСҮТ-д өндөр үнээр авсан хэмээн буруутгагдаж буй аж. Тус төвийн эх сурвалжуудын мэдээлснээр зах зээлийн үнэ нь 39 саяар тооцогдох, компьютер томографын “Philips Brilliance CT16” гэх хуучин тоног төхөөрөмжийг эмнэлэгтээ өндөр үнээр авсан гэнэ. Тус аппарат нь 17 жил ашиглах хугацаатай, үйлдвэрлээд 15 жил болсон байж. БНХАУ-аас 2013 онд “Суперпроб” гэдэг компани Монголд оруулж ирсэн уг тоног төхөөрөмжийг 2020 онд ДУБ гэх аж ахуйн нэгжтэй 300 гаруй сая төгрөгөөр худалдан авах гэрээ байгуулсан гэдэг.