ICPark буюу Олон улсын соёлын цэцэрлэгт хүрээлэнгийн ногоон үзэсгэлэнгийн талбайд Монголын мод үржүүлэг, цэцэрлэгжүүлэлтийн мэргэжлийн нэгдсэн холбоо ТТБ-аас жил бүр уламжлал болгон зохион байгуулдаг үндэсний хэмжээний “Модлог Экспо 2023” модлог ургамлын тарьц, суулгацын үзэсгэлэн худалдааг 2023 аравдугаар сарын 05-15-ны өдрүүдэд зохион байгуулж байна. Энэ удаагийн үзэсгэлэн худалдааг Байгаль орчин, аялал жуулчлалын яам, Засгийн газрын хэрэгжүүлэгч агентлаг Ойн газартай хамтран зохион байгуулж байгаа юм.

      Үзэсгэлэн худалдаанд Ногоон харш ХХК, Таримал загийн төгөл ХХК, Ази цэцэрлэгжилт ХХК, Одтоб ХХК, Булган голын алим ХХК, Агрофорест ХХК, Шаамар питомник ХХК, Шинэс ой ХХК, Эв эрчим ХХК зэрэг монголын шилдэг мод үржүүлгийн газрууд оролцож байна. Үзэсгэлэн худалдаагаар зөвхөн дотооддоо тарьж, ургуулсан нийт 40 гаруй зүйлийн модны тарьц, суулгацыг танилцуулж, худалдаалахаас гадна мод тарих, үржүүлэх, арчилж хамгаалах талаар мэргэжилтнүүд зөвлөгөө өгч байна.

       Энэ жилээс эхлэн Монголын мод үржүүлэг, цэцэрлэгжүүлэлтийн мэргэжлийн байгууллагуудын нэгдсэн холбоооос Тэрбум мод үндэсний хөдөлгөөний хүрээнд иргэд, аж ахуйн нэгжүүдэд стандартын тарьц, суулгацыг Модлог биржээр худалдаалах туршилтын ажлыг эхлүүлж байгаагаас гадна цаашид “Модлог” цахим биржийг ажиллуулах юм. Энэхүү цахим биржийн системд үндэсний мод үржүүлгийн газруудын тарьц, суулгацын нөөц, мэргэжлийн байгууллагуудын мэдээллээс гадна мэргэжлийн, сайн дурын оролцоотой хэрэгжүүлж байгаа төсөл хөтөлбөрүүд, түүнд оролцогч талуудын мэдээлэл багтах юм. Цахим биржээр тэрбум мод тарих амлалт авсан томоохон аж ахуйн нэгж, уул уурхайн компаниуд мэргэжлийн мод үржүүлэгчидтэй гэрээ хэлэлцээр хийх боломжтойгоос гадна тэдгээр байгууллагуудын тарьсан мод, хэрэгжүүлсэн төсөл хөтөлбөрүүдийн талаарх мэдээлэл агуулагдах юм. 

       Мөн Монгол Улсын Ерөнхийлөгчийн санаачлагаар үндэсний хэмжээнд хэрэгжүүлж байгаа мод тарих арга хэмжээг зөв чиглүүлэхэд Монголын мод үржүүлэг, цэцэрлэгжүүлэлтийн мэргэжлийн байгууллагуудын нэгдсэн холбоо нь олны танил урлаг, спортын одуудтай хамтран иргэн аж ахуйн нэгжүүдэд зориулсан нөлөөллийн арга хэмжээг хэрэгжүүлж эхэлж байна.

       Төслийн ногоон байгууламжийн ажлыг мэргэжлийн байгууллагуудын хамтын ажиллагаа, дэмжлэгтэйгээр амжилттай үргэлжлүүлж байна. IC Park буюу Олон улсын соёлын цэцэрлэгт хүрээлэн нь нийт 35 га талбайд төлөвлөгдсөн бөгөөд хүүхдийн шинжлэх ухаан, танин мэдэхүйн хүрээлэн, музей, Ботаник цэцэрлэг буюу дөрвөн улирлын цэцэрлэг, алсыг харагч, ногоон байгууламжууд, олон улсын соёлын төвүүд, олон төрөлт спортын талбай, спортын төвүүд, алсыг харах өндөрлөгүүд, ногоон үзэсгэлэнгийн талбай зэргийг байгуулах юм. Цэцэрлэгт хүрээлэнгийн барилга байгууламжууд нь ногоон технологийг ашигласан байх буюу сэргээгдэх эрчим хүч, саарал ус дахин ашиглах технологийн шийдлийг нэвтрүүлж буйгаараа онцлогтой.